Ravi Shastri : भारताचे माजी प्रशिक्षक रवी शास्त्री आता पुन्हा एकदा समालोचनाकडे वळले आहेत. ते सध्या स्काई स्पोर्ट्ससाठी समोलोचन करतात. रवी शास्त्री हे इंग्लंडमध्ये सुरू असलेल्या द हंड्रेड स्पर्धेत समालोचन करत आहेत. दरम्यान, द हंड्रेड स्पर्धेच्या लॉर्ड्सवरील सामन्यात समालोचन करत असताना रवी शास्त्रींची गुगलचे सीईओ सुंदर पिचाई आणि भारतातील आघाडीचे उद्योगपती मुकेश अंबानी यांच्याशी भेट झाली. या भेटीचा फोटो रवी शास्त्रींनी आपल्या सोशल मीडिया अकाऊंटवरून शेअर केला आहे. (Ravi Shastri Share Photo With Sundar Pichai Mukesh Ambani Kevin Pietersen Reaction)

रवी शास्त्री यांनी सुंदर पिचाई आणि मुकेश अंबानी यांच्या सोबतचा फोटो शेअर करत त्याला 'दोन जबरदस्त व्यक्तीमत्वांची साथ लाभली. ही व्यक्तीमत्वे क्रिकेटवर खूप प्रेम करतात. मुकेश अंबानी आणि सुंदर पिचाई' असे कॅप्शन दिले. दरम्यान, रवी शास्त्रींच्या या फोटोवर इंग्लंडचा माजी कर्णधार केविन पिटरसनने देखील प्रतिक्रिया दिली. त्याने खास इमोजी शेअर करत फोटो जबरदस्त असल्याचे सांगितले.

जगभरात वनडे क्रिकेटची जागा आता टी 20 आणि फ्रेंचायजी क्रिकेट घेईल असा अंदाज क्रिकेट जाणकार व्यक्त करत आहेत. रवी शास्त्री यांनी देखील द्विपक्षीय वनडे मालिका बंद कराव्यात अशी मागणी केली आहे. ते म्हणाले होते की, 'मी द्विपक्षीय मालिकांबाबत सतर्क आहे. टी 20 क्रिकेटमध्ये खूप फ्रेंचायजी क्रिकेट होत आहे. यात वेस्ट इंडीज, भारत, पाकिस्तान या देशांचा देखील समावेश आहे.'

ते पुढे म्हणाले की, 'तुम्ही द्विपक्षीय मालिका कमी खेळू शकता. तुम्ही थेट वर्ल्डकपमध्ये एकत्र खेळू शकता. यामुळे आयसीसी वर्ल्डकप सारख्या स्पर्धांचे महत्व वाढेल. लोक ते पहायला उत्सुक राहतील. मला असे वाटते की दोन स्तरांची गरज आहे नाही तर 10 वर्षात कसोटी क्रिकेट संपून जाईल.'