Ravindra Jadeja Fitness Update : भारताचा अष्टपैलू खेळाडू रविंद्र जडेजा हा आशिया कपमध्ये दुखापतग्रस्त झाला. त्यानंतर तो त्वरित मायदेशी परतला आणि आपल्या दुखऱ्या गुडघ्यावर शस्त्रक्रिया करून घेतली. दरम्यान, आशिया कपमध्ये पहिल्या दोन सामन्यात अगदी फिट दिसणाऱ्या रविंद्र जडेजाला अचानक दुखापत कशी झाली असा प्रश्न चाहत्यांना पडला होता. आता बीसीसीआयच्या सूत्रांनी दिलेल्या माहितीनुसार रविंद्र जडेजाला सामन्यादरम्यान किंवा सरावादरम्यान दुखापत झालेली नाही तर हॉटेलमध्ये एक धाडसी क्रीडाप्रकार करताना ही दुखापत झाली आहे.

भारतीय संघ दुबईमध्ये ज्या हॉटेलमध्ये वास्तव्याला होता. तेथे रविंद्र जडेजाला एक वॉटर बेस ट्रेनिंग अॅक्टिव्हिटी करण्यास सांगण्यात आले होते. याबाबत टाईम्स ऑफ इंडियाच्या सूत्रांनी दिलेली माहिती अशी की, 'रविंद्र जडेजाला या धाडसी ट्रेनिंग सेशनमध्ये एका स्की बोर्डवर स्वतःचा तोल सावरायचा होता. हा धाडसी क्रीडा प्रकार बीसीसीआयच्या ट्रेनिंग मॅन्युअलमध्ये नाहीये. जडेजाला हे धाडस करण्याची कोणतीच गरज नव्हती. तो स्की-बोर्डवरून घसरला आणि त्याचा गुडघा दुखावला. दुखापत एवढी गंभीर होती की त्याला त्वरित शस्त्रक्रिया करावी लागली.'

आता प्रश्न असा आहे की वर्ल्डकप सारखी महत्वाची स्पर्धा तोंडावर असताना टीम इंडियातील एका महत्वाच्या खेळाडूने 'स्की बोर्ड' ट्रेनिंग सेशन करणे गरजेचे होते का? मिळालेल्या माहितीनुसार बीसीसीआय जडेजाला ज्या पद्धतीने दुखापत झाली त्यावरून आधीच संतापली आहे. यावर स्पष्टीकरण देणे गरजेचे असल्याचे काही वरिष्ठ अधिकाऱ्यांना वाटते.

सूत्रांनी सांगितले की, 'या संपूर्ण प्रकरणात संघाचा मुख्य प्रशिक्षक राहुल द्रविड इतका कसा शांत राहिला याचे देखील आश्चर्य आहे. त्याने दुखापत झाल्यानंतर या संपूर्ण प्रक्रियेवर प्रश्नचिन्ह का उपस्थित केले नाही. या सर्वाचा परिपाक म्हणजे रविंद्र जडेजाशिवायच भारताला ऑस्ट्रेलियातील टी 20 वर्ल्डकप खेळायला जावे लागेल असे दिसते.'