नवी दिल्ली - भारताचा अष्टपैलू खेळाडू रवींद्र जडेजा याची सर्वाधिक उत्तेजक चाचणीत करण्यात आल्याची माहिती राष्ट्रीय उत्तेजक विरोधी संघटनेकडून (नाडा) बुधवारी देण्यात आली. या वर्षी जानेवारी ते मे या पाच महिन्यांच्या अंतरात तीन वेळा त्याची चाचणी घेण्यात आली.

या कालावधीत पुरुष व महिला अशी एकूण ५५ क्रिकेटपटूंची ५८ नमुना चाचणी घेण्यात आली. नाडाकडून सर्व खेळांतील खेळाडूंच्या १५०० पेक्षा जास्त नमुना चाचण्या घेण्यात आल्या असून ६० पानांची यादीही त्यांच्याकडून तयार करण्यात आली आहे.

नाडाकडून २०२१ व २०२२ मध्ये क्रिकेटपटूंची अनुक्रमे ५४ व ६० नमुना चाचणी घेण्यात आली होती. २०२२ मध्ये महिला क्रिकेटपटूंकडून २० नमुना चाचणी घेण्यात आली. २०२१ व २०२२ मध्ये रोहित शर्माची सर्वाधिक तीन वेळा नमुना चाचणी करण्यात आली होती.

विराट कोहलीची नमुना चाचणी अद्याप घेण्यात आलेली नाही. या वर्षी पाच महिन्यांमध्ये हरमनप्रीत कौर व स्मृती मानधना या दोन महिला क्रिकेटपटूंची प्रत्येकी एक वेळा चाचणी करण्यात आली आहे.

आयपीएलमध्ये २० नमुना चाचण्या करण्यात आल्या. क्रिकेटपटूंच्या ५८ पैकी सात नमुने रक्ताचे घेण्यात आले आहेत. ५१ नमुने हे लघवीचे आहेत.

सूर्यकुमार यादव, के. एल. राहुल, इशान किशन, मोहम्मद सिराज, दीपक चहर, मयांक अग्रवाल, राहुल त्रिपाठी, भुवनेश्वर कुमार, रिद्धिमान साहा, दिनेश कार्तिक, यशस्वी जायस्वाल, अंबाती रायुडू, पियूष चावला आणि मनीष पांडे या भारतीय क्रिकेटपटूंची आणि डेव्हिड विस, डेव्हिड मिलर,

कॅमेरून ग्रीन, सुनील नारायन, आंद्रे रसेल, डेव्हिड वॉर्नर, राशीद खान, डेव्हिड विली, ट्रेंट बोल्ट, मार्कस स्टॉयनिस, मार्क वूड, अॅडम झाम्पा, सॅम करन, लियाम लिव्हिंगस्टोन जोफ्रा आर्चर या परदेशी क्रिकेटपटूंची नमुना चाचणी घेण्यात आली आहे.