बाकू (अझरबैझान) - भारताने बाकू येथे सुरू असलेल्या जागतिक नेमबाजी स्पर्धेमध्ये दुसरे पदक पटकावले. ऱ्हिदम सांगवान हिने बुधवारी भारताला पहिले पदक जिंकून दिले होते. आता सरबज्योत सिंग व दिव्या टी. एस. या जोडीने गुरुवारी भारताच्या पदकसंख्येत भर घातली. सरबज्योत सिंग व दिव्या टी. एस. या जोडीने १० मीटर एअर पिस्तूल मिश्र प्रकारात सुवर्णपदकाचा वेध घेतला.

सरबज्योत-दिव्या या जोडीने १० मीटर एअर पिस्तूल मिश्र प्रकाराच्या पात्रता फेरीत ५८१ गुणांची कमाई करीत पहिला क्रमांक पटकावला. याच प्रकारात वरुण तोमर आणि ईशा सिंग या भारतीय जोडीला पाचव्या स्थानावर समाधान मानावे लागले.

त्यांचे ब्राँझपदक थोडक्यासाठी हुकले. सरबज्योत-दिव्या जोडीने सुवर्णपदकासाठीच्या लढतीत दामिर मिकेच-झोराना अरुणोविच या सर्बीयाच्या जोडीवर १६-१४ असा विजय साकारला आणि सुवर्णपदकाला गवसणी घातली. मिकेच-झोराना यांनी रौप्यपदक पटकावले. इस्माईल केलेस-सायमल यिलमाझ या तुर्कीच्या जोडीला ब्राँझपदकावर समाधान मानावे लागले.

१० मीटर एअर रायफल मिश्र प्रकारात निराशा

१० मीटर एअर रायफल मिश्र प्रकारात भारतीय खेळाडूंकडून निराशा झाली. तिलोत्तमा सेन-हृदय हझारिका या जोडीची ६२७.६ गुणांसह १७ व्या स्थानावर घसरण झाली. रमिता व रुद्रांक्ष पाटील या जोडीचीही ६२६.३ गुणांसह २८ व्या स्थानावर घसरगुंडी उडाली. या प्रकारात पहिल्या दोन स्थानांवर चीनच्या खेळाडूंनी बाजी मारली. झेक प्रजासत्ताकच्या जोडीने ब्राँझपदकाची कमाई केली.

पदकतालिकेत दुसरे स्थान

जागतिक नेमबाजी स्पर्धेच्या पहिल्या दोन दिवसांच्या निकालानंतर भारतीय संघ दोन पदकांनिशी दुसऱ्या स्थानावर विराजमान आहे. भारताने एक सुवर्ण व एक ब्राँझ अशी दोन पदके पटकाविली आहेत. चीनने एक सुवर्णपदक आणि एक रौप्यपदक अशी दोन पदके जिंकत पहिले स्थान कायम ठेवले आहे.