पुणे : सहाव्या वरिष्ठ गटाच्या विश्वकरंडक रोलबॉल स्पर्धेत पुरुषांमध्ये भारतीय संघाने पोलंडला हरवून विजयी सलामी दिली. म्हाळुंगे बालेवाडी येथील श्री शिवछत्रपती क्रीडानगरीतील बॅडमिंटन हॉलमध्ये शुक्रवारपासून सुरू झालेल्या या स्पर्धेत सलामीच्या लढतीत पुरुषांच्या गटात भारतीय संघाने पोलंड संघाला १४-१ अशा फरकाने पराभूत केले.

मध्यंतरालाच भारतीय संघाने ८-० अशी आघाडी घेतली होती. भारताकडून आकाश गणेशवाडेने चार, हर्षल घुगे, सचिन सैनीने प्रत्येकी दोन तर मिहीर साने, श्रीकांत साहू, विकी सैनी, आदित्य सुतार, गुरुवचनसिंग व टी. प्रदीपने प्रत्येकी एक गोल केला. पोलंड संघाकडून एकमोव गोल रडदिया सत्यमने केला.

या स्पर्धेचे उद्घाटन उच्चतंत्र व शिक्षण तथा जिल्ह्याचे पालकमंत्री चंद्रकांत पाटील यांच्या हस्ते झाले. यावेळी पुणे महानगरपालिकेचे आयुक्त विक्रम कुमार, पिंपरी चिंचवड महापालिकेचे आयुक्त शेखर सिंग, पीएमआरडीएचे आयुक्त राहुल महिवाल, महाराष्ट्र रोलबॉल संघटनेचे अध्यक्ष संदीप खर्डेकर, राजू दाभाडे, मंजुश्री खर्डेकर, ज्योती कळमकर हे उपस्थित होते.

महिला गटात इजिप्तचा विजय

महिला गटात इजिप्त संघाने नेपाळ संघाला ३-० असे हरविले. मध्यंतरालाच इजिप्त संघाने ३-० अशी आघाडी घेतली होती. इजिप्तच्या मुस्तफा रीतीजने तीन ही गोल केले. नेपाळ संघाचे खेळाडू मात्र गोल करण्यात अपयशी ठरले.