गेल्या अनेक दिवसांपासून रशिया आणि युक्रेन (Russia And Ukraine War) यांच्यात वाद चालू होता व या वादाचा परिणाम आता युद्धामध्ये झालेला पाहायला मिळत आहे. हल्ली दोन्ही देशांत तणावाची स्थिती निर्माण झालीय. रशिया आणि युक्रेनमध्ये सुरू असलेल्या या युद्धावर जगातील महान फिरकी गोलंदाज शेन वॉर्ननंही आपली प्रतिक्रिया दिलीय. शेन वॉर्ननं (Shane Warne) युक्रेनच्या बाजूनं संदेश लिहून रशियाची कारवाई पूर्णपणे चुकीची असल्याचं म्हंटलंय.

वॉर्ननं ट्विटव्दारे युक्रेनचं समर्थन केलंय. रशियाची कारवाई पूर्णपणे चुकीची आणि अन्यायकारक असल्याचंही त्यानं म्हटलंय. शेन वॉर्न पुढे लिहितो, संपूर्ण जग युक्रेन लोकांच्या पाठीशी आहे. कारण, रशियन सैन्यानं युक्रेनवर अन्यायकारक हल्ला केलाय आणि यात अनेक नागरिकांचा बळी गेलाय. सध्या युक्रेनमधील चित्रं भयावह आहे. पण, हे युध्द थांबवण्यासाठी काहीही केलं जात नाहीय. याच आश्चर्य वाटतंय. शेवटी त्यानं युक्रेनियन मित्र आंद्रे शवचेंको याच्यासोबतच प्रेम व्यक्त केलंय.

रशियाकडून सातत्यानं होत असलेलं आक्रमण पाहता अनेक क्रीडा स्पर्धा रद्द करण्यात आल्या आहेत. UEFA चॅम्पियन्स लीगचा अंतिम सामना मे महिन्यात सेंट पीटर्सबर्ग येथे खेळवला जाणार होता; पण आता तो तिथून हलवण्यात आलाय. आता हा सामना 28 मे रोजी पॅरिसमधील स्टेड डी फ्रान्स (Stade De France Stadium) येथे खेळवला जाणार आहे. चॅम्पियन्स लीग व्यतिरिक्त रशियन ग्रँड प्रिक्सचा (Russian Grand Prix) हंगाम देखील रद्द करण्यात आलाय. यासोबतच क्रीडाविश्वातील लोक एकजुटीनं आवाज उठवत आहेत. रशियात होणार्‍या क्रीडा स्पर्धांचं आयोजन रशियाबाहेर हलवण्याची मागणी करत आहेत. तर, अनेक खेळाडूंनी हे युद्ध थांबवण्याची मागणीही केलीय.