South Africa vs India, 3rd ODI : दक्षिण आफ्रिकेचा सलामीवीर क्विंटन डिकॉकनं टीम इंडियाविरुद्ध विक्रमी शतक झळकावलं. टॉस गमावल्यानंतर आफ्रिकेची सुरुवात खराब झाली. 70 धावांवर दक्षिण आफ्रिकेच्या संघानं तीन विकेट गमावल्या होत्या. संघाला सुरुवातीच्या पडझडीतून सावरत क्विंटन डिकॉकनं शतक साजरं केले. त्याने दुसेनच्या साथीनं संघाचा डाव सावरला. चौथ्या विकेटसाठी या जोडीनं 144 धावांची भागीदारी केली. क्विंटन डिकॉक 124 धावा करुन तंबूत परतला.

बाद होण्यापूर्वी क्विंटन डिकॉकनं (Quinton De Kock) खास विक्रम आपल्या नावे केला. टीम इंडियाविरुद्ध (Team India ) त्याने सहावे शतक झळकावले. भारताविरुद्ध सर्वाधिक शतके झळकवणाऱ्या फलंदाजांच्या यादीत तो दुसऱ्या स्थानावर आहे. श्रीलंकेचा माजी सलामीवीर सनथ जयसूर्यानं 85 डावात टीम इंडियाविरुद्ध सर्वाधिक 7 शतकं झळकावली आहेत. क्विंटन डिकॉकनं अवघ्या 16 व्या डावात 6 शतके झळकावली आहेत.

दक्षिण आफ्रिकेचा माजी फलंदाज एबी डिव्हिलियर्स या यादीत तिसऱ्या स्थानावर आहे. त्याने 32 डावात 6 शतके झळकावली आहेत. ऑस्ट्रेलियाचा माजी कर्णधार रिकी पाँटिंगच्या नावे देखील 59 डावात 6 शतकांची नोंद आहे. त्यापाठोपाठ श्रीलंकन दिग्गज कुमार संगकाराने 71 डावात 6 शतक ठोकली आहेत. या सर्वांना मागे टाकत क्विंटन डिकॉक दुसऱ्या स्थानावर पोहचला आहे. सर्वात वेगाने भारताविरुद्ध सर्वाधिक शतके करण्याच्या तो उंबरठ्यावर आहे.

एका संघा विरुद्ध 6 शतक झळकवणाऱ्या अन्य फलंदाजांमध्ये विरेंद्र सेहवागचाही नंबर येतो. सेहवागनं 23 डावात न्यूझीलंड विरुद्ध सहा शतके ठोकली होती. ऑस्ट्रेलियन एरॉन फिंचनं इंग्लंड विरुद्ध 23 डावात 6 शतके करुन दाखवली आहेत. पाकिस्तानी सलामीवीर सईद अन्वरच्या नावे श्रीलंकेविरुद्ध सहा शतकांची नोंद आहे. त्याने 26 डावात हा पराक्रम करुन दाखवला होता.