दक्षिण आफ्रिके विरुद्धच्या पहिल्या वनडे सामन्यात विराट कोहलीने सचिन तेंडुलकरचा मोठा विक्रम मोडित काढला. आफ्रिकेनं पहिल्यांदा फलंदाजी करताना टीम इंडियासमोर 297 धावांचे आव्हान ठेवले होते. या धावांचा पाठलाग करताना कर्णधार लोकेश राहुल स्वस्तात माघारी फिरला. लोकेश राहुल बाद झाल्यानंतर विराट कोहली मैदानात आला. त्याने 9 धावा पूर्ण करताना खास रेकॉर्ड त्याने आपल्या नावे केला. सचिन तेंडुलकरला मागे टाकत परदेशात सर्वाधिक धावा करण्याचा पराक्रम आता कोहलीच्या नावे नोंद झाला आहे. (Virat Kohli Break Sachin Tendulkar Sourav Ganguly Rahul Dravid Records)

दक्षिण आफ्रिकेविरुद्धच्या पहिल्या वनडे सामन्यापूर्वी विराट कोहलीच्या (Virat Kohli) खात्यात परदेशात खेळताना वनडेत एकूण 5057 धावा होत्या. वनडेमध्ये पदेशात सर्वाधिक धावा करण्याचा विक्रम हा सचिन तेंडुलकरच्या (Sachin Tendulkar) नावे होता. त्याने 5065 धावा केल्या आहेत. विराट कोहलीने पहिल्या वनडेत 9 धावा करताच त्याने सचिनचा हा विक्रम मागे टाकला.

याशिवाय 27 धावांचा टप्पा पार करताच कोहलीनं (1287) राहुल द्रविड (1309) आणि सौरव गांगुली (1313) गांगुली यांचा दक्षिण आफ्रिकेविरुद्ध सर्वाधिक धावा करण्याचा विक्रमही मागे टाकला. दक्षिण आफ्रिकेच्या विरुद्ध सर्वाधिक धावा करण्याचा विक्रम अजूनही सचिन तेंडुलकरच्या नावे आहे. वनडेत तेंडुलकर आफ्रिकेविरुद्ध 2001 धावा कुटल्या आहेत. दक्षिण आफ्रिकेविरुद्ध 27 धावा करताच कोहली या यादीत दुसऱ्या क्रमांकावर पोहचला आहे. वनडेत दक्षिण आफ्रिकेविरुद्ध सर्वाधिक धावा करण्याच्या शर्यतीत केवळ सचिन तेंडुलकर कोहलीच्या पुढे आहे.

कोहलीसाठी हा सामना खास असाच आहे. टी-20 संघाचे नेतृत्व सोडल्यानंतर बीसीसीआयने त्याच्याकडून वनडेची कॅप्टन्सी काढून घेतली. दक्षिण आफ्रिकेविरुद्धच्या कसोटी मालिकेतील पराभवानंतर कोहलीनं आणखी एक मोठा निर्णय घेतला. त्याने कसोटी संघाचे कर्णधारपदही सोडले. आता कोहली बॅटिंगवर फोकस करणार आहे. जवळपास दोन वर्षांपासून त्याच्या भात्यातून शतक झालेले नाही. ही प्रतिक्षा पहिल्या वनडेत संपवून तो आपल्या खात्यात आणखी एक शतक नोंदवण्यासाठी उत्सुक असेल.