भारतीय संघाचा माजी क्रिकेटर सचिन तेंडुलकरने माजी गोलंदाज अजित आगरकरच्या साथीने कोरोनाच्या नियमाचे उल्लंघन केल्याचे वृत्त समोर आले आहे. या दोघांनी कोरोनाचा प्रोटॉकॉल (Covid 19 Protocols) मोडून पुण्यातील गोल्फ खेळण्याचा आनंद घेतल्याची चर्चा रंगली आहे. मुळशी तालुक्यातील ऑक्सफोर्ट गोल्फ कोर्स (Oxford golf course) येथे दोन्ही माजी क्रिकेटर्स शुक्रवारी उपस्थितीत होते, असे बोलले जाते.

राज्यातील कोरोनाच्या वाढत्या प्रादुर्भावामुळे सर्व खेळाची मैदाने लॉकडाउन असताना या दोघांनी खेळाचा आनंद कसा घेतला? कोरोनामुळे पुण्यात कडक निर्बंध आहेत. या परिस्थितीत यांना खेळाची परवानगी कोणी दिली? असे प्रश्न उपस्थितीत होत आहेत. सचिन तेंडुलकरने मुंबईहून पुणे प्रवास करताना ई पास काढला होता का? असा प्रश्नही उपस्थिती झाला आहे. पुण्यातील ऑक्सफोर्ड गोल्फ रिसॉर्टच्या व्हीव्हीआयपी पार्किंगमध्ये शुक्रवारी सचिन तेंडुलकरची कार दिसून आली होती. ही कार सचिनचीच असल्याचे स्पष्ट झाल्यानंतर त्याने कोरोना नियमाचे उल्लंघन केल्याची चर्चा रंगण्यास सुरुवात झालीये.