मास्टर ब्लास्टर सचिन तेंडुलकर (Sachin Tendulkar) ने पुन्हा एकदा आपल्यातील वेगळेपण दाखवून दिले आहे. अपघातामध्ये जखमी झालेल्या जीवलग मित्राच्या मदतीला धावणाऱ्या पोलिस कर्मचाऱ्याचे त्याने खास आभार मानले आहेत. आल्या मित्राच्या मदतीला धावून येणाऱ्या वाहतूक पोलिस कर्मचाऱ्याची सचिन तेंडुलकरने भेट घेतली. सचिन तेंडुलकरने सोशल मीडियाच्या माध्यमातून यासंदर्भातील किस्सा शेअर केलाय. त्याने ही गोष्ट सांगताना खास कॅप्शनही दिल्याचे पाहायाला मिळतं.

ट्विटरच्या माध्यमातून सचिन तेंडुलकरने ही गोष्ट शेअर केलीये. त्याने पोस्टमध्ये लिहिलंय की, 'काही दिवसांपूर्वी माझ्या जवळच्या मित्राचा अपघात झाला होता. परमेश्वराच्या कृपेनं आता तो बरा आहे. अपघातानंतर वाहतूक पोलिस कर्मचाऱ्याने तात्काळ मदत केली. यामुळेच माझ्या मित्राचा जीव वाचला. संबंधित पोलिसाने अपघातातील तीव्रता ओळखून मित्राला रिक्षातून रुग्णालयात दाखल केले.

मित्राच्या मदतीला धावून त्याचे प्राण वाचवलेल्या पोलिस कर्मचाऱ्याची भेट घेतली. प्रत्येक्षात भेटून त्याचे आभार मानले. आपल्या आजूबाजूला असे अनेक लोक आहेत. कर्तव्याच्या पलिकडे जाऊन ते लोकांची मदत करत असतात. अशा लोकांमुळेच जग सुंदर वाटते, असे मास्टर ब्लास्टर सचिनने म्हटले आहे. एवढेच नाही तर या पोस्टमध्ये त्याने लोकांनी वाहतुकीचे नियम पाळून पोलिसांना सहकार्य करावे, असे आवाहनही केले आहे.