सैफ चॅम्पियनशिपमधील भारत विरुद्ध नेपाळ हा सामना शनिवारी पार पडला. या सामन्यात भारताने नेपाळवर २-० ने विजय मिळवला. मात्र या निकालापेक्षा जास्त चर्चा झाली, ती सामन्यादरम्यान झालेल्या वादाची. सामन्याच्या ६४ व्या मिनिटाला भारत आणि नेपाळचे खेळाडू एकमेकांशी मैदानातच भिडले होते.

या सामन्यात भारताच्या सुनील छेत्री आणि महेश सिंग यांनी प्रत्येकी एक गोल केले. नेपाळला मात्र एकही गोल करता आला नाही. छेत्री याने सामन्याच्या ६१ व्या मिनिटाला गोल केला होता. त्यानंतर काही वेळातच मैदानावर मोठा वाद झाला. यानंतर झालेल्या झटापटीचे व्हिडिओ सध्या सोशल मीडियावर व्हायरल होत आहेत.

नेमकं काय घडलं?

सामन्याच्या ६४ व्या मिनिटाला भारताचा राहुल भेके आणि नेपाळचा बिमल मागर एक हेडर मारण्यासाठी पुढे आले. यावेळी हे दोघेही एकमेकांना धडकले. याची परिणीती वादात झाली, आणि त्यांच्यात धक्काबुक्कीही सुरू झाली. यानंतर दोन्ही संघांमधील इतर खेळाडूंनीही या वादात उडी घेतली.

भारताचा दुसरा विजय

दरम्यान, या चॅम्पियनशिपमध्ये भारताने आपला सलग दुसरा विजय मिळवला आहे. यापूर्वी बुधवारी भारताचा पहिला सामना पाकिस्तान विरुद्ध झाला होता. यावेळी भारताने पाकिस्तानवर ४-० असा विजय मिळवला होता. या सामन्यातही खेळाडूंमध्ये झटापट झालेली पहायला मिळाली होती.