Wrestler Sajan Bhanwala : भारताच्या साजन भानवालाने स्पेनमध्ये सुरू असलेल्या 23 वर्षाखालील ग्रिको रोमन जागतिक अजिंक्यपद स्पर्धेत कांस्य पदक पटकावत इतिहास रचला. साजन भानवाला हा 23 वर्षाखालील ग्रिको रोमन कुस्ती जागतिक अजिंक्यपद स्पर्धेत पदक जिंकणारा पहिला भारतीय कुस्तीपटू ठरला आहे. त्याने युक्रेनच्या दिमेत्रो व्हासेट्स्कीचा पराभव करत कांस्य पदक पटकावले.

युक्रेनचा कुस्तीपटू दिमेत्रीने साजनला मॅटच्या सर्कलबाहेर काढत चार गुण मिळवून दमदार सुरूवात केली. मात्र भानवालाने जबदस्त पुनरागमन करत प्रतिस्पर्ध्यावर चांगली पकड निर्माण केली. त्याने 4 गुण मिळवत बरोबरी साधली. भानवालाने सामन्यात सकारात्मक खेळ करत पार तेरे डाव टाकला आणि युक्रेनच्या प्रतिस्पर्ध्याविरूद्ध अजून 4 गुणांची कमाई केली. मात्र युक्रेनच्या दिमेत्रीने पुन्हा एकदा मुसंडी मारत 10 - 4 अशी आघाडी घेतली. दरम्यान, भानवालाने ही आघाडी कमी करत 10 - 10 अशी बरोबरी साधली. ही लढत 10 - 10 अशी बरोबरीत संपली. मात्र साजन भानवालाला क्रायटेरियाच्या जोरावर विजेता घोषित करण्यात आले.