Sakshi Malik Warning for Protest : जागतिक कुस्ती संघटनेकडून भारतीय कुस्ती संघटनेवरील निलंबन मागे घेण्याचा निर्णय घेण्यात आला. यामुळे भारतातील कुस्ती या खेळाशी संबंधित वाद पुन्हा उफाळून आला.

साक्षी मलिक, बजरंग पुनिया या ऑलिंपिक पदकविजेत्या कुस्तीपटूंनी स्पष्ट अन्‌ परखड मत व्यक्त करताना म्हटले की, भारतीय कुस्ती संघटनेच्या नव्या कार्यकारिणीचे अध्यक्ष संजय सिंह यांनी निलंबन मागे घेण्यासाठी कुटील पद्धतीचा वापर केला आहे. बृजभूषण सिंह यांच्या गटातील प्रत्येक व्यक्तीला संघटनेपासून कायमस्वरूपी दूर करा, अन्यथा पुन्हा एकदा आंदोलन करू, असा इशारा साक्षी मलिक हिने पुढे केंद्रीय क्रीडा मंत्रालयाला दिला आहे.

साक्षी मलिक हिने सोशल माध्यमावर आपले मत व्यक्त करताना सांगितले की, संजय सिंह यांनी जागतिक कुस्ती संघटनेसोबत हातमिळवणी केली. त्यामुळेच निलंबन मागे घेण्याचा निर्णय घेण्यात आला. याबाबत आम्हाला मंगळवारी माहिती मिळाली. बृजभूषण सिंह व संजय सिंह या दोघांनीही आपण कायद्यापेक्षा मोठे आहोत हे पुन्हा एकदा दाखवून दिले आहे.

सरकारच्या सूचनांचे पालन केले नाही

भारतातील कुस्ती या खेळाशी संबंधित पदावर बृजभूषण सिंह किंवा त्यांच्या कुटुंबीयामधील एकही व्यक्ती असणार नाही, असेही त्यांच्याकडून सांगण्यात आले होते. केंद्र सरकारकडूनही याबाबत सूचना करण्यात आली होती, पण दोन ते तीन दिवसांपूर्वीच बृजभूषण यांचा मुलगा उत्तर प्रदेश कुस्ती संघटनेच्या अध्यक्षपदी विराजमान झाला. याचा अर्थ त्यांनी केंद्रीय क्रीडा मंत्रालयाच्या सूचनांचेही पालन केले नाही, अशी खंत बजरंग पुनिया याच्याकडून व्यक्त करण्यात आली.

लवकरच पाऊल उचलू : अनुराग ठाकूर

केंद्रीय क्रीडा मंत्री अनुराग ठाकूर यांना कुस्ती संघटनेतील या नव्या घडामोडीबाबत विचारले असता ते म्हणाले, या प्रकरणाबाबत विचार सुरू आहे आणि चौकशीही करत आहोत यावर कोणता निर्णय घ्यायचा किंवा कोणते पाऊल उचलायचे याबाबत निर्णय घेण्यात येणार आहे.

"मी कुस्ती या खेळामधून निवृत्ती स्वीकारली असली तरी बृजभूषण सिंह आणि त्याच्या गटाला संघटनेत काम करू देणार नाही. महिलांवरील अत्याचार होऊ देणार नाही. पुढील दोन ते चार दिवसांमध्ये आमच्याकडून कोणते पाऊल उचलण्यात येईल याबाबत स्पष्टता मिळेल."

- साक्षी मलिक, ऑलिंपिक पदकविजेती कुस्तीपटू