Satwiksairaj Rankireddy Chirag Shetty : भारताच्या सात्विकराज रंकरेड्डी आणि चिराग शेट्टी या पुरूष दुहेरी जोडीनं थायलंड ऑपनची फायनल गाठली आहे. त्यांनी तैवानच्या ली मिंग चे आणि तांग काई वेई या जोडीचा सरळ गेममध्ये पराभव केला. एशियन गेम्सध्ये सुवर्ण पदक जिंकणाऱ्या या भारतीय जोडीने तैवानच्या जोडीचा 35 मिनिटात पराभव केला. त्यानी सामना 21-11, 21-12 अशा दोन गेममध्ये जिकंला.

सात्विक आणि चिरागचे थायलंडशी एक घट्ट नातं आहे. त्यांनी पाच वर्षापूर्वी 2019 ला इथेच पहिल्यांदा सुपर 500 स्पर्धा जिंकली होती. आता ते अजून एक विजेतेपद पटकावण्याच्या जवळ पोहचले आहेत.

बॅडमिंटन वर्ल्ड फेडरेशन वर्ल्ड टूरमध्ये सात्विक अन् चिरागने एक वादळ निर्माण केलं आहे. त्यांनी हंगामात चौथ्यांदा अंतिम फेरी गाठली आहे. त्यांनी मलेशिया ओपन 1000 आणि इंडिया सुपर 500 मध्ये मध्ये उपविजेतेपद पटकावलं. त्यानंतर मार्चमध्ये त्यांनी फ्रेंच सुपर 750 चे विजेतेपद पटकावलं.

आता रविवारी सात्विक आणि चिराग आपला हंगामातील चौथा अंतिम सामना खेळणार आहेत. ही भारतीय जोडी जागतिक क्रमवारीत तिसऱ्या स्थानावर आहे. आता त्यांचा सामना चीनच्या चॅन बो यँग आणि लुई यी सोबत होणार आहे. त्यांनी दक्षिण कोरियाच्या जोडीचा 21-19, 21-18 अशा गोममध्ये पराभव केला होता.