गयाना : भारत अ आणि वेस्ट इंडीज अ यांच्यात सुरु असलेल्या तिसऱ्या अनौपचारिक कसोटी सामन्यात शुभमन गिलने द्विशतक ठोकले. त्याने 248 चेंडूंमध्ये नाबाद 204 धावा केल्या. तसेच कर्णधार हनुमा विहारीच्या शतकाच्या जोरावर भारताने भक्कम आघाडी घेतली आहे. 

भारताने चार बाद 365 या धावसंख्येवर दुसरा डाव घोषित केला. वेस्ट इंडिजसमोर आता विजयासाठी 373 धावांचे लक्ष्य आहे. दिवसाचा खेळ संपताना यजमान संघ एकही विकेट न गमावता 37 धावांपर्यंत मजल मारु शकला.

सलामीचे 4 फलंदाज झटपट बाद झाल्यावर शुभमनने सामन्याची सूत्रे आपल्या हाती घेतली. कर्णधार हनुमा विहारीच्या साथीने भारताचा डाव सावरला. तंत्रशुद्ध फटके खेळत शुभमनने आपलं शतक साजरं केलं. भारताचं प्रतिनिधीत्व करणाऱ्या संघाकडून खेळत असताना प्रथम श्रेणी शतक झळकावणारा शुभमन सर्वात तरुण खेळाडू ठरला. त्याने माजी क्रिकेटपटू गौतम गंभीरचा विक्रम मोडला.