हैदराबाद कसोटीत भारतीय संघ बॅकफूटवर असल्याचे दिसत आहे, यामागचे एक कारण म्हणजे तिसऱ्या क्रमांकावर फलंदाजी करणारा शुभमन गिल. या सामन्याच्या दोन्ही डावात शुभमन गिल पूर्णपणे फ्लॉप ठरला आहे, दुसऱ्या डावात त्याला खातेही उघडता आले नाही आणि दुसऱ्याच चेंडूवर तो बाद झाला. शुबमन गिलचा कसोटी फॉरमॅटमधील फ्लॉप शोमुळे त्याला सोशल मीडियावर ट्रोलही केले जात आहे.

हैदराबाद कसोटीबद्दल बोलायचे झाले तर, टीम इंडिया 223 धावांचा पाठलाग करत असताना पहिली विकेट यशस्वी जैस्वालच्या रूपाने पडली आणि दोन चेंडूनंतर शुभमन गिलही बाद झाला. याआधी, शुभमन गिल पहिल्या डावातही संघर्ष करताना दिसला होता. त्याने 66 चेंडूत 23 धावा केल्या होत्या.

शुबमन गिल दीर्घकाळापासून कसोटी फॉर्मेटमध्ये खराब फॉर्म मध्ये आहे, त्यामुळे त्याच्या स्थानावर प्रश्न उपस्थित केले जात आहेत. यापूर्वी तो कसोटीत सलामीला येत होता. पण रोहित शर्मासोबत आता यशस्वी जैस्वाल सलामी करतो. तर गिलला क्रमांक-3ची जबाबदारी देण्यात आले. पण त्याला त्याची जबाबदारी अद्याप नीटपणे सांभाळता आलेली नाही.

शुबमन गिलच्या आकडेवारीवर नजर टाकली तर, तिसऱ्या क्रमांकावर तो खेळायला आल्यापासून त्याचा फॉर्म खराब झाला आहे. शुभमन गिल 12 जुलै 2023 रोजी पहिल्या डावात तिसऱ्या क्रमांकावर फलंदाजीला आला होता. त्यानंतर गिलने केवळ 47, 6, 10, 29*, 2, 26, 36, 10, 23, 0 धावा केल्या आहेत. शुभमन गिलच्या बॅटमधून कसोटीतील शेवटची मोठी खेळी मार्च 2023 मध्ये आली होती, जेव्हा त्याने अहमदाबादमध्ये 128 धावा केल्या होत्या.

आता आगामी सामन्यात टीम इंडिया शुभमन गिलला संधी देणार का, असा प्रश्न उपस्थित होत आहे. कारण कसोटी फॉरमॅटमध्ये तिसऱ्या क्रमांकावर फलंदाजी करणे खूप कठीण आहे. या क्रमांकावर भारतासाठी मोठ्या दिग्गज खेळाडूंनी फलंदाजी केली आहेत. राहुल द्रविड आणि चेतेश्वर पुजाराचा वारसा पुढे नेणे शुभमन गिलसाठी इतके सोपे नसेल. गिलला कसोटीतून वगळण्याची वेळ आली आहे, असे लोक ट्विटरवर म्हणू लागले आहेत.