नवी दिल्ली : थेट पंतप्रधान नरेंद्र मोदींपर्यंत आर्जव करण्यापर्यंतचे सर्व प्रयत्न यशस्वी ठरले असून हाँगझाऊ येथील आशिया क्रीडा स्पर्धेत भारताचे पुरुष आणि महिला फुटबॉल संघ पाठवण्याचा निर्णय क्रीडा मंत्रालयाने घेतला आहे. त्यासाठी नियमात बदल करण्यात आला.

आशिया खंडातील क्रमवारीत अव्वल आठ संघांत स्थान असेल तरच फुटबॉल संघ पाठवले जातील, असा क्रीडा खात्याचा नियम आहे. त्यामुळे भारतीय ऑलिंपिक संघटनेने फुटबॉल संघ पाठवण्यास नकार दिला होता.

भाजपचे खासदार अध्यक्ष असलेल्या अखिल भारतीय फुटबॉल फेडरेशनने क्रीडा मंत्रालयाला संघ पाठवण्याबाबत विनंती केली होती. तसेच पुरुष संघाचे प्रशिक्षक इगोर स्टिमॅक यांनी तर पंतप्रधान नरेंद्र मोदी यांनी हस्तक्षेप करावा आणि आम्हाला खेळण्याची संधी द्यावी,

असे आर्जव केले होते. हे सर्व प्रयत्न फळाला आले आहेत. भारतीय फुटबॉल संघासाठी आनंदाची बातमी आहे. पुरुष आणि महिलांचे संघ आशिया स्पर्धेसाठी पाठवण्यात येणार असल्याची माहिती क्रीडामंत्री अनुराग ठाकूर यांनी दिली.

आशिया खंडातील क्रमवारीत अव्वल आठ संघांत स्थान नसले तरी सध्याची कामगिरी निश्चितच आशादायी आहे. त्यामुळे आम्ही नियमाला अपवाद केला. आता आशिया स्पर्धेत आपला संघ जोरदार कामगिरी करेल, अशी आशाही ठाकूर यांनी व्यक्त केली. पुरुषांचा संघ आशियातील क्रमवारीत १८ व्या, तर महिलांचा संघ ११ व्या क्रमांकावर आहे.