नवी दिल्ली : भारताची ऑलिम्पिक पदक विजेती लोव्हलिना बोरगोहैनने (Lovlina Borgohain) राष्ट्रकुल स्पर्धेआधीच मानसिक छळ होत असल्याची पोस्ट टाकत खळबळ उडवून दिली होती. आता या पोस्टनंतर भारतीय क्रीडा मंत्रालय अॅक्शन मोड मध्ये आले आहे. क्रीडा मंत्रालयाने (Sports Ministry) ट्विट करत इंडियन ऑलिम्पिक असोसिएशनला विनंती केली.

क्रीडा मंत्रालयाने 'आम्ही इंडियन ऑलिम्पिक असोसिएशनला विनंती करतो की त्यांनी लोव्हलिना बोरगोहैनच्या प्रशिक्षकांच्या अधिकृत मान्यतेची लवकरात लवकर सोय करावी.'

दरम्यान, लोव्हलिनाच्या ट्विटनंतर तिचे वडील टिकेन बोरगोहैन (Tiken Borgohain) मध्यमांना दिलेल्या मुलाखतीत म्हणाले की, 'हा खूप दुःखद प्रकार आहे. मात्र मला वाटते की तिने येणाऱ्या स्पर्धेवर लक्ष केंद्रीत करावे आणि राष्ट्रकुल स्पर्धेत चांगली कामगिरी करावी. आम्हाला तिच्याकडून देशासाठी पदक मिळवण्याची अपेक्षा आहे.'

लोव्हलिनाचे वडील पुढे म्हणाले की, 'लोव्हलिनाने तिच्या प्रशिक्षकांना राष्ट्रकुल व्हिलेजमध्ये (Bermingham CWG village) प्रवेश नाकारल्यानंतर ट्विट केले. मी बॉक्सिंग फेडरेशन ऑफ इंडियाच्या सचिवांशी बोललो आहे. ते प्रशिक्षकांना राष्ट्रकुल व्हिलेजमध्ये प्रवेश मिळावा यासाठी प्रयत्न करत आहेत.'