भारताचा वेगवान गोलंदाज एस श्रीसंत (S. Sreesanth) सध्या भारतीय क्रिकेट (Indian Cricket) वर्तुळात पुन्हा सक्रीय झाला आहे. मॅच फिक्सिंग (Match Fixing) प्रकरणातून त्याची मुक्तता झाल्यानंतर अनेक वर्ष त्याने क्रिकेटच्या मैदानावर परतण्यासाठी प्रयत्न केले. अखेर त्याच्या प्रयत्नांना यश आले. तो आयपीएलच्या लिलावात (IPL 2022 Auction) देखील उतरला होता. मात्र त्याच्या नावाचा उल्लेख देखील बीसीसीआयने करण्याचे टाळले होते. त्यानंतर तो केरळकडून रणजी ट्रॉफीमध्ये खेळत होता. मात्र त्याला दुखापत झाल्याने रूग्णालयात दाखल करण्यात आले आहे.

या सर्व घटनांपूर्वी त्याने विजडेन इंडियाला एक मुलाखत दिली होती. या मुलाखतीवेळी त्याने आपल्या आयुष्यातील सर्वात चांगला चेंडू (Sreesanth Best Bowling) कधी टाकला होता हे सांगितले. तो म्हणाला की, त्याने कारकिर्दित अनेक चांगले चेंडू टाकले आहेत. विशेष करून 2010 मध्ये दक्षिण आफ्रिकेच्या दौऱ्यावर असताना जॅक कॅलिसला (Jacques Kallis) एका बाऊन्सवर बाद करणे ही गोष्ट खूप खास होती. मात्र 2006 च्या विंडीज दौऱ्यावर ज्या पद्धतीने डॅरेन गंगाला (Daren Ganga) बाद केले होते तो माझा सर्वश्रेष्ठ चेंडू होता.

श्रीसंत या मुलाखतीत पुढे म्हणाला की, 'मी वेस्ट इंडीजच्या सलामीवीराला सपशेल गंडवले. त्याला मी दमलोय असा भास करून दिला. एवढंच काय तर समालोचकांना देखील असेच वाटले की मी दमलोय. मी चेंडू टाकण्याचा वेग कमी केला होता. तसेच मी सारखे माझ्या बुटाची लेस बांधत होतो. मी साधारणपणे सातवे किंवा आठवे षटक टाकत होतो. मला वाटते की फक्त मुनाफ पटेलला मी काय करतोय हे माहिती होते. तो माझ्याजवळ आला आणि त्याने 'नाटक कर रहा हैं!' असे म्हणाला. त्याला माहिती होते की मी इंडियन एअरलाईन्स आणि चेन्नई लीग सामन्यात अशीच रणनीती वापरायचो. मी माझ्या रणनीतीप्रमाणे काही कमी वेगाच्या चेंडूंनंतर एक वेगवान आऊटस्विंगर टाकला. गंगा या चेंडूवर बोल्ड झाला. हा माझ्या कारकिर्दितील सर्वश्रेष्ठ चेंडू होता.'