दक्षिण आफ्रिकेने रविवारी पाच सामन्यांच्या T20I मालिकेतील दुसऱ्या सामन्यात भारताचा 4 विकेटने पराभव केला. यासह आफ्रिकेने पाच टी-20 सामन्यांच्या मालिकेत 2-0 अशी आघाडी घेतली आहे. भारताला आता अशा परिस्थितीत मालिका जिंकायची असेल तर उर्वरित तीन सामने जिंकावे लागतील. अशातच अजूनही प्लेइंग इलेव्हनमध्ये संधी न मिळालेल्या वेगवान युवा गोलंदाज उमरान मलिकची चर्चा अधिक रंगली आहे.(sunil gavaskar gave big statement about umran malik debut)

टीम इंडियाचे माजी क्रिकेटर सुनील गावसकर यांनी वेगवान युवा गोलंदाज उमरान मलिकची वाट पाहत असल्याचे म्हटलं आहे. ते म्हणाले, मी आत्तापर्यंत कोणाची वाट पाहिली असेल तर तो सचिन तेंडुलकर होता. आणि आता त्याच्यानंतर मी युवा गोलंदाज उमरान मलिकची वाट पाहत आहे. विशेष म्हणजे सर्व क्रिकेटप्रेमीदेखील त्याची वाट पाहत आहेत.

सुनील गावसकर असं का म्हणाले?

जम्मूच्या या वेगवान गोलंदाजाने आयपीएल 2022 मध्ये सातत्याने 150 kmph च्या वेगाने गोलंदाजी केली होती. हे पाहता त्याला दक्षिण आफ्रिकेविरुद्धच्या भारतीय संघात स्थान मिळाले. मात्र टीम इंडियाने त्याला प्लेइंग इलेव्हनमध्ये अद्याप स्थान दिलेल नाही. दिल्लीत 9 जून रोजी झालेल्या पहिल्या सामन्यात खेळला गेला नव्हता. हा पहिला सामना भारताने 7 विकेट्सनी गमावला, त्यानंतर आता दुसऱ्या सामन्यात तरी त्याला प्लेइंग इलेव्हनमध्ये स्थान दिले जाईल अशी अपेक्षा होती. मात्र, तसे काही घडलेच नाही.

दुसर्‍या टी-20 सामन्याबद्दल बोलायचे झाले तर, दक्षिण आफ्रिकेच्या कर्णधाराने नाणेफेक जिंकली आणि भारताला प्रथम फलंदाजी करायला सांगितले. कटकच्या बाराबती स्टेडियमवर खेळल्या गेलेल्या सामन्यात प्रथम फलंदाजी करताना भारताने 20 षटकात 6 गडी गमावून 148 धावा केल्या. दक्षिण आफ्रिकेने हे लक्ष्य 18.2 षटकांत 6 गडी गमावून पूर्ण केले. दक्षिण आफ्रिकेने या विजयासह मालिकेत 2-0 अशी आघाडी घेतली आहे.