Sunil Gavaskar Rishabh Pant Dinesh Karthik : भारत आणि पाकिस्तान यांच्यातील सामना जसजसा काही दिवसांवर येऊन ठेपला आहे तसतसे भारताची प्लेईंग 11 कशी असेल याबाबत तर्क वितर्क लढवले जात आहेत. प्लेईंग 11 मध्ये दिनेश कार्तिक खेळणार की ऋषभ पंत याबाबत खलबते सुरू आहेत. दरम्यान, भारताचे माजी कर्णधार सुनिल गावसकर यांनी एक आयडियाची कल्पना लढवून हे दोघेही प्लेईंग 11 मध्ये कसे खेळू शकतात हे सांगितले.

रोहित शर्मा टी 20 वर्ल्डकप 2022 मधील आपला पहिला सामना रविवारी पाकिस्तानविरूद्ध खेळणार आहे. दरम्यान, या सामन्यासाठी भारताचे कॉम्बिनेशन कसे असले पाहिजे याबाबत सुनिल गावसकर यांनी आपले मत मांडले. स्टार स्पोर्ट्सशी बोलताना गावसकर म्हणाले की, 'जर टीम इंडिया सहा गोलंदाज घेऊन उतरणार असेल तर हार्दिक पांड्या हा त्यांचा सहावा गोलंदाज असेल. अशा परिस्थितीत ऋषभ पंतला प्लेईंग 11 मध्ये कदाचित जागा मिळू शकणार नाही. मात्र जर हार्दिक पांड्या पाचवा गोलंदाज म्हणून खेळला तर ऋषभ पंत सहाव्या क्रमांकाचा फलंदाज म्हणून संघात खेळू शकतो. त्यानंतर दिनेश कार्तिक सातव्या क्रमांकावर फलंदाजीला येईल. त्यानंतर चार गोलंदाज असतील. असे कॉम्बिनेशन होऊ शकते. मात्र यासाठी आपल्याला थोडा वेळ वाट पहावी लागले.'

गावसकर पुढे म्हणाले की, 'संघ व्यवस्थापन नक्कीच डावखुऱ्या फलंदजाला संघात स्थान देण्यास इच्छुक असणार आहेत. पंत चांगल्या फॉर्ममध्ये देखील आहे. कधी कधी तुम्ही विचार कराल की ऋषभ पंतला किती षटके फलंदाजी करायला मिळेल. त्याला तीन ते चार षटके खेळायला मिळतील का? तीन चार षटके राहिले असताना दिनेश कार्तिक की ऋषभ पंत या सर्व गोष्टींचा संघ व्यवस्थापनाला विचार करावा लागले आणि मग निर्णय घ्यावा लागले.'