तिरुवअनंतपुरम : ऑस्ट्रेलियामध्ये १६ ऑक्टोबर ते १३ नोव्हेंबर या दरम्यान टी-२० विश्‍वकरंडकाचे आयोजन करण्यात येणार आहे. या प्रतिष्ठेच्या क्रिकेट स्पर्धेमध्ये यशस्वी होण्यासाठी ऑस्ट्रेलियातील परिस्थिती, वातावरण यांच्याशी समरूप व्हावे लागेल, असे स्पष्ट मत भारताचा युवा डावखुरा वेगवान गोलंदाज अर्शदीप सिंग याने व्यक्त केले आहे. दक्षिण आफ्रिकेविरुद्धच्या पहिल्या टी-२० लढतीत सामनावीराचा पुरस्कार पटकावल्यानंतर पत्रकार परिषदेत तो बोलत होता.

भारतीय संघाने बुधवारी दक्षिण आफ्रिकेला पराभूत केले आणि तीन टी-२० सामन्यांच्या मालिकेत १-० अशी आघाडी घेतली. या विजयाबाबत अर्शदीप म्हणाला, सराव सत्रात आम्ही कसून अभ्यास केला. त्यानंतर आखलेल्या योजनांचा पहिल्या लढतीत अवलंब केला. या लढतीत पॉवर प्लेमधील गोलंदाजीही छान झाली. यापुढेही याच कामगिरीची पुनरावृत्ती करण्याचा प्रयत्न करणार आहोत, असेही त्याने नमूद केले. मागील दहा दिवसांमध्ये अधिक सक्षम होऊन पुनरागमन केले आहे. याचा फायदा गोलंदाजीत होत आहे. मैदानात आणखी छान कामगिरी करण्यासाठी सर्वस्व पणाला लावणार आहे, असे अर्शदीप आवर्जून सांगतो.

अर्शदीपने पहिल्या लढतीत डी कॉक, रायरी रोसो व डेव्हीड मिलर या दक्षिण आफ्रिकेच्या तीन प्रमुख फलंदाजांना बाद करीत भारताच्या विजयात मोलाचा वाटा उचलला. या वेळी तो म्हणाला, चेंडू स्वींग होत होते. त्यामुळे चेंडू योग्य टप्प्यात टाकण्याचे ठरवले. सुरुवातीला विकेट मिळाल्याचा आनंद आहे. नवीन चेंडूने दीपक चहरसोबत चांगली गोलंदाजी करता आली, असे ही त्याने सांगितले.

आयपीएलचा शेवट होत असताना भारतीय संघ व्यवस्थापनाकडून मला सांगण्यात आले की, आगामी काळासाठी आम्ही तुझा विचार करीत आहोत. त्यानंतर जेव्हा संधी दिली जाते, तेव्हा आपला ठसा उमटवायचा हे मनापासून ठरवले. टीम इंडियामध्ये निवड होईल की नाही याबाबत जास्त विचार केला नाही.

-अर्शदीप सिंग, वेगवान गोलंदाज