मुंबई : दिलीप वेंगसरकर हे माझे हिरो आणि आदर्श आहेत, अशी भावना विख्यात कॅन्सर सर्जन आणि टाटा कॅन्सर रुग्णालयाचे संचालक शैलेश श्रीखंडे यांनी व्यक्त केली. निमित्त होते ड्रीम इलेव्हन करंडकाच्या बक्षीस वितरण सोहळ्याचे. १६ वर्षांखालील मुलांच्या क्रिकेट स्पर्धेच्या पारितोषिक वितरण समारंभात ते बोलत होते.

ओव्हल मैदानातील ड्रीम इलेव्हन वेंगसरकर क्रिकेट अकादमीच्या मैदानावर ड्रीम इलेव्हन कप या १६ वर्षांखालील मुलांच्या क्रिकेट स्पर्धेच्या पारितोषिक वितरण समारंभास येऊ शकाल का, असा प्रश्‍न वेंगसरकर यांनी मला फोन करून विचारला.

मी तात्काळ त्यांना ‘हो’ म्हणून सांगितले. मी देखील आय.ई.एस. शाळेसाठी लहान असताना शालेय क्रिकेट स्पर्धेत खेळलो असल्याने आणि दिलीप वेंगसरकर या व्यक्तीबद्दल प्रचंड आदर असल्याने मी येथे आलो. क्रिकेटमधील आपल्या कारकिर्दीनंतर या व्यक्तीने युवा क्रिकेटपटूंसाठी जे अप्रतिम कार्य केले आहे, त्याला खरोखरच तोड नाही.

त्यामुळेच दोन शस्त्रक्रियांमध्ये थोडा वेळ काढून मी आज येथे आलो आहे. क्रिकेट खेळायला मैदानात उतरल्यानंतर खेळपट्टी, वातावरण या साऱ्यांना दोष न देता प्रत्येक वेळी आपली सर्वोत्तम खेळी करायला हवी. कारण हीच गोष्ट आपल्या उर्वरित आयुष्यातदेखील उपयोगी ठरते. आम्ही आजदेखील प्रत्येक शस्त्रक्रिया करताना आपले सर्व ज्ञान पणाला लावतो तेव्हाच त्या यशस्वी होतात, असे श्रीखंडे यांनी सांगितले.

दिलीप वेंगसरकर यांनीदेखील यावेळी बोलताना आपल्या फलंदाजीने संघाला विजय मिळवून देणाऱ्या हर्ष गायकर आणि आयुष शिंदे यांनी शेवटपर्यंत नाबाद राहिल्याबद्दल त्यांचे कौतुक केले. जेव्हा एखाद्या फलंदाजांचा जम बसतो, त्यावेळी आपली विकेट फेकून परतण्यापेक्षा संघाला विजयी करून परतणे हेच महत्त्वाचे असते, असे त्यांनी सांगितले. या स्पर्धेत ड्रीम इलेव्हन वेंगसरकर क्रिकेट अकादमीने क्रिकेट मंत्रा अकादमी संघावर ८ विकेट राखून मात करून या स्पर्धेचे विजेतेपद पटकावले. विजेत्यांना डॉ. श्रीखंडे आणि भारताचे माजी कर्णधार दिलीप वेंगसरकर यांच्या हस्ते गौरविण्यात आले.