भारतीय संघाचा आशिया कप 2022 मधील प्रवास संपुष्टात आला आहे. बुधवारी झालेल्या सामन्यात पाकिस्तानने अफगाणिस्तानचा एका विकेटने पराभव केला. पाकिस्तानच्या विजयामुळे भारत आणि अफगाणिस्तान हे दोन्ही संघ अंतिम फेरीच्या शर्यतीतून बाहेर पडले आहेत. आशिया चषकात निराशाजनक खेळ दाखवल्यानंतर आता भारतीय संघाचे मुख्य लक्ष्य टी-20 विश्वचषकातील कामगिरीवर असेल. BCCI 15 सप्टेंबरला T20 विश्वचषकासाठी भारतीय संघाची घोषणा करू शकते, पण त्याआधी चिंतेची बाब म्हणजे गोलंदाजांची दुखापत आहे.

भारताची पाच प्रमुख गोलंदाज फिटनेस/दुखापतीच्या समस्यांनी त्रस्त आहेत. अशा स्थितीत दुखापतग्रस्त खेळाडूंच्या जोरावर टीम इंडिया विश्वचषक कसा जिंकणार असा प्रश्न नक्कीच पडतो.

जसप्रीत बुमराह पाठीच्या दुखापतीशी झुंज देत आहे. या दुखापतीमुळे त्याला आशिया कपमधूनही बाहेर व्हावे लागले. बुमराह ऑस्ट्रेलिया आणि दक्षिण आफ्रिकेविरुद्धच्या मालिकेतूनही बाहेर जाण्याची शक्यता आहे. बुमराह टी-20 विश्वचषकासाठी तंदुरुस्त होईल, अशी आशा भारतीय चाहत्यांना आहे.

बरगडीच्या दुखापतीमुळे हर्षल पटेलला आशिया चषक स्पर्धेतून बाहेर पडावे लागले. हर्षल पटेल या महिन्यात ऑस्ट्रेलियाविरुद्धच्या T20I मालिकेदरम्यान तो मैदानात परतण्याची अपेक्षा आहे. हर्षल पटेल हा स्लो बॉलसह यॉर्कर टाकण्यात माहिर आहे.

स्टार अष्टपैलू रवींद्र जडेजाला दुखापतीमुळे सध्या सुरू असलेल्या आशिया चषक स्पर्धेतून बाहेर पडावे लागले आहे. जडेजाच्या उजव्या गुडघ्याला दुखापत झाली होती, आता त्याचे यशस्वी ऑपरेशन झाले आहे. शस्त्रक्रियेनंतर रवींद्र जडेजाला 2022 च्या टी-20 विश्वचषकात खेळणार का नाही हे पाहावे लागेल.

आवेश खानलाही ताप आल्यामुळे आशिया चषकातील उर्वरित सामन्यांमधून बाहेर पडावे लागले. त्याच्या जागी वेगवान गोलंदाज दीपक चहरचा संघात समावेश करण्यात आला आहे. वेस्ट इंडिज दौऱ्यापासून आवेश खराब फॉर्ममध्ये आहे आणि त्याने हाँगकाँगविरुद्धच्या सामन्यात ५० हून अधिक धावा दिल्या होत्या. पण त्याची तब्येतही भारतीय संघासाठी चिंतेचे कारण आहे.

न्यूझीलंड-ए विरुद्धच्या सध्याच्या मालिकेसाठी प्रसिद्ध कृष्णा भारत-अ संघात खेळत आहे. पण पाठीच्या दुखापतीमुळे कृष्णाला या मालिकेतून माघार घ्यावी लागली. आता कृष्णाच्या बाहेर पडल्यानंतर वेगवान गोलंदाज शार्दुल ठाकूरचा भारत-अ संघात समावेश करण्यात आला आहे.