Wrestling Federation of India : युनायटेड वर्ल्ड रेसलिंगने भारतीय कुस्ती महासंघावरील निलंबन तात्काळ मागे घेतलं आहे. त्यामुळे भारतीय कुस्ती महासंघाचे सदस्यत्व पुन्हा बहाल करण्यात आले आहे. मंगळवारी हा निर्णय घेण्यात आला.

गेल्या वर्षी ऑगस्टमध्ये भारतीय कुस्ती महासंघाचे सदस्यत्व अनिश्चित काळासाठी रद्द करण्यात आले होते. अध्यक्षपदासाठी निवडणूक न घेतल्याचे कारण यासाठी देण्यात आले होते. या संदर्भात युनायटेड वर्ल्ड रेसलिंगने जारी केलेल्या निवेदनात म्हटले आहे की, भारतीय कुस्ती महासंघाचे सदस्यत्व गेल्या वर्षी ऑगस्टमध्ये निलंबित करण्यात आले होते. कारण भारतीय संस्था वेळेवर निवडणुका घेण्यात अयशस्वी ठरली होती. UWW शिस्तपालन चेंबरने निर्णय घेतला होता की महासंघावर निलंबनाची कारवाई करण्यासाठी हे पुरेसे कारण आहे. कारण फेडरेशनमधील ही परिस्थिती कमीत कमी सहा महिने जैसेथे अशीच होती.

दरम्यान निलंबनाचा आढावा घेण्यासाठी 9 फेब्रुवारी रोजी झालेल्या बैठकीत युनायटेड वर्ल्ड रेसलिंग अधिकाऱ्यांनी काही अटी घालत निलंबन मागे घेण्याचा निर्णय घेतला.

UWW ने भारतीय कुस्ती महासंघाला त्यांच्या ऍथलीट आयोगाच्या निवडणुका पुन्हा आयोजित करण्याचे निर्देश दिले आहेत. त्यात असे नमूद केले आहे की या आयोगासाठी उमेदवार सक्रिय क्रीडापटू असणे आवश्यक आहे किंवा चार वर्षांहून अधिक काळ सेवानिवृत्त झालेला नसावा. मतदार विशेषतः खेळाडू असतील. या निवडणुका 1 जुलै 2024 नंतर कोणत्याही वरिष्ठ राष्ट्रीय स्पर्धेदरम्यान घेतल्या जातील.

आदेशात पुढे म्हटले आहे की, WFI ताबडतोब UWW ला लेखी गॅरंटी देईल की सर्व कुस्तीपटूंना सर्व WFI स्पर्धांमध्ये विशेषत: ऑलिम्पिक खेळ आणि इतर कोणत्याही प्रमुख राष्ट्रीय आणि आंतरराष्ट्रीय स्पर्धांमध्ये कोणताही भेदभाव न करता भाग घेण्याची परवानगी दिली जाईल.