Tim Southee : येत्या ५ ऑक्टोबरपासून आयसीसी एकदिवसीय वर्ल्डकपचा थरार 5 ऑक्टोबरपासून भारतात रंगणार आहे. अहमदाबादच्या नरेंद्र मोदी स्टेडियमवर या स्पर्धेतील पहिला सामना इंग्लंड आणि न्यूझीलंड यांच्यात खेळल्या जाणार आहे. पण वर्ल्डकपआधी न्यूझीलंड संघ दुखापतींच्या समस्येशी झुंजत आहे.

नियमित कर्णधार केन विल्यमसनला सुरुवातीच्या काही सामन्यांना मुकावे लागू शकते. दरम्यान, वेगवान गोलंदाज टीम साऊदीच्या रूपाने संघाला आणखी एक धक्का बसला आहे, कारण वर्ल्डकपपूर्वी त्याच्यावर शस्त्रक्रिया करावी लागणार आहे. त्याच्या वर्ल्डकप खेळण्याबाबतचा निर्णय येत्या काही वेळात घेतला जाईल.

न्यूझीलंडच्या इंग्लंड दौऱ्यात वेगवान गोलंदाजाला दुखापत झाली. आता टीम साऊथी वर्ल्डकप 2023 खेळणार का नाही, यावर पुढील आठवड्यात निर्णय घेतला जाईल. त्याच्या अंगठ्याचे हाड फ्रॅक्चर असल्यामुळे त्याच्यावर शस्त्रक्रिया करावी लागणार आहे. शनिवारी लॉर्ड्सवर झालेल्या अंतिम वनडेत साउथीला दुखापत झाल्यानंतर न्यूझीलंड क्रिकेटने बुधवारी दुपारी या वृत्ताला दुजोरा दिला.

डॉक्टरांच्या अहवालानंतर, 34 वर्षीय खेळाडूची निवड केली जाईल. संघ अनेक दुखापतींशी झुंजत आहे, त्यामुळे प्रशिक्षक गॅरी स्टेडला आशा आहे की साऊथी वेळेत बरा होईल. स्टीड म्हणाले, आम्हाला खात्री आहे की टिमची शस्त्रक्रिया चांगली होईल.