टोक्यो: ऑल्मिपिकमधून (tokyo olympics) भारतासाठी एक चांगली बातमी आहे. सध्या प्रचंड फॉर्ममध्ये असलेली भारताची अव्वल महिला तिरंदाज दीपिकाकुमारीने (deepika kumari) रशियाच्या क्सेनिया पेरोवाचे (ksenia perova) पराभव करुन उपांत्यपूर्व फेरीत प्रवेश केला आहे. दीपिकाकुमारी सध्या महिला तिरंदाजांमध्ये (archery) जागतिक क्रमवारीत पहिल्या स्थानावर आहे. ब्राझीलमध्ये झालेल्या रियो ऑलिम्पिकमध्ये सांघिक प्रकारात क्सेनिया पेरोवाने रौप्यपदक मिळवले होते. (tokyo olympics in archery event deepika kumari beat russias ksenia perova enters quarterfinals dmp82)

काल अतानु दासने कोरियाच्या अव्वल तिरंदाजाचा पराभव करत, अशाच प्रकारचा धक्का दिला होता. दीपिकाकुमारीने आज शूट ऑफच्या फेरीत अशाच प्रकारच्या विजयाची नोंद केली. दीपिका कुमारीने पहिला सेट २८-२४ असा जिंकला. दुसऱ्या सेटमध्ये क्सेनिया पेरोवाने पुनरागमन केले. २६-२७ अवघ्या एका गुणाच्या फरकाने दीपिकाने हा सेट गमावला.

तिसऱ्या सेटमध्ये दीपिकाने २८-२७ ने विजय मिळवत २-१ अशी आघाडी घेतली. चौथ्या सेटमध्ये बरोबरी झाली. त्यानंतर क्सेनियाने पाचवा सेट २५-२६ असा जिंकला. पाच सेटनंतर दोघींचे पाच गुण झाल्यामुळे अखेर शूट ऑफचा निर्णय झाला. या शूट ऑफ राऊंडमध्ये क्सेनियाने सात गुण मिळवले तर दीपिकाने अचूक नेम साधत १० गुण मिळवत उपांत्यपूर्व फेरीत प्रवेश केला.