टोकियो - अमेरिकेचा स्टार BMX रेसर आणि रिओ ऑलिम्पिक चॅम्पियन कॉनर फिल्ड्सचा रेसिंगवेळी अपघात झाला. टोकियो ऑलिम्पिकमध्ये झालेल्या या अपघातानंतर कॉनर फिल्ड्सला थेट आयसीयूमध्ये दाखल करण्यात आलं आहे. सेमीफायनलमधील तिसऱ्या रेसवेळी क्रॅश झाल्यानं ट्रॅकवर दोन तीन स्पर्धक एकमेकांवर आदळले. यात कॉनर फिल्ड्स जखमी झाला असून त्याच्या मेंदूत रक्तस्राव झाल्याची माहिती समजते.

रेसर अपघातात जखमी झाला असला तरी त्याने आधीच फायनलसाठी पात्रता पूर्ण केली होती. मात्र आता अपघातानंतर त्याला आयसीयूमध्ये नेण्यात आलं आहे. कॉनर फिल्ड्सची आई लिसा यांनी त्याच्या प्रकृतीची माहिती देताना सांगितलं की, कॉनर फिल्ड्सला आयसीयूतून हाय लेव्हल केअरमध्ये शिफ्ट कऱण्यात आलं आहे.

दरम्यान, सीटी स्कॅन केल्यानंतर मेंदूत आणखी जखम आणि रक्तस्राव झालेला नसल्याचं म्हटलं आहे. लिसा यांनी फेसबुकवर एक पोस्टही शेअर केली आहे. त्यात म्हटलं की, 28 वर्षांच्या फिल्ड्ससाठी प्रार्थना केल्याबद्दल सर्वांचे आभार. कॉनर फिल्ड्सचे वडिल माइक यांनी युएसए टुडे स्पोर्ट्शी बोलताना म्हटलं की, कॉनरची प्रकृती सुधारत आहे. त्याला शुद्ध असून तो कुठे आहे हे माहिती आहे. लोकांना ओळखत असल्याचही वडिलांनी सांगितलं.