गुजरातची भाविना पटेल हिने टेबल टेनिसमधील महिला एकेरीत क्लास-4 गटात फायनलमध्ये प्रवेश केलाय. पॅरालिंपिक स्पर्धेत पदक निश्चत करताच टेबल टेनिसमध्ये असा पराक्रम करणारी ती देशातील पहिलीच पॅरालिंपिक खेळाडू ठरलीये. तिचा इथपर्यंतचा प्रवास सहज आणि सोपा मुळीच नव्हता. ज्यावेळी ती अवघ्या 1 वर्षांची होती त्यावेळी चालण्याचा प्रयत्न करताना ती कोसळली. यात तिला पायला लकवा मारला. काही दिवसांनी याच आजारात तिने दुसरा पायही गमावला. बालपणापासूनच संघर्षमय आयुष्याचा सामना करणाऱ्या या लेकीनं जिद्दीच्या जोरावर सर्व गोष्टींवर मात करुन इतिहास घडवता येतो, हे दाखवून दिले आहे.

भाविना तीन भावंडात सर्वात छोटी

भाविना पटेल ही गुजरातमधील वडनगर येथील सुंडिया गावातील रहिवासी आहे. तिचे वडील हंसमुख भाई पटेल यांच्या गावातच एक छोटे दुकान आहे. तिघा भावंडात भाविना ही सर्वात छोटी आहे. भाविकाच्या वडिलांनी एका मुलाखतीत दिलेल्या माहितीनुसार, तिच्याशिवाय दोन्ही मुलं सदृढ आहेत. वर्षांची असताना भाविकाला लकव्यामुळे पाय गमावले. शस्त्रक्रिया झाल्यानंतर ती कुबड्या घेऊन चालू लागली.

पॅरा टेबल टेनिस खेळाकडे कशी वळली भाविना

भाविनाने संस्कृतमधी उच्च शिक्षण घेतले आहे. ती ज्यावेळी दिव्यांग स्कूलमध्ये कॉम्प्युटर शिकायला जायची त्यावेळी गुजरातमधील पॅरा टेबल टेनिसचे कोचने तिला प्रोत्साहन दिले. व्हिलचेअरवरील स्पर्धेत तिने बाजी मारली आणि मग तिने कधीच मागे वळून पाहिले नाही. तिने आतापर्यंत 27 वेगवेगळ्या देशांतील स्पर्धेत सहभाग घेत अनेक आंतरराष्ट्रीय स्पर्धा गाजवल्या आहेत.

विवाहानंतर पती अन् सासरच्या मंडळींची मिळाली साथ

दिव्यांग खेळाडूंमध्ये लक्षवेधी कामगिरी करणाऱ्या भाविनाला स्पोर्ट्स कोट्यातून बीमा निगममध्ये नोकरी मिळाली. तीन वर्षांपूर्वीच तिचा विवाह देखील झाला. विवाहानंतर तिच्या सासरच्या मंडळींनी आणि पतीने तिला खेळासाठी प्रोत्साहन दिले.