उंच उडीत मरियप्पनची रौप्य तर शरद कुमारची कांस्यकमाई

Tokyo Paralympics: टोक्यो येथे सुरू असलेल्या पॅरालिम्पिक स्पर्धेत भारतीय खेळाडूंनी दमदार कामगिरी केली. उंची उडीच्या T42 गटात भारताने चक्क दोन मेडल मिळवली. मरियप्पन थंगवेलू याने रौप्य पदकाला गवसणी घातली, तर शरद कुमारने कांस्यपदकाची कमाई केली. मरियप्पनने १.८६ मीटर एवढी उंच उडी मारली. त्याचा प्रयत्न केवळ ०.०२ मीटरने तोकडा पडला. अमेरिकेच्या सॅम ग्रीव्ह याने १.८८ मीटर उंच उडी मारून सुवर्णपदक पटकावले. तर कांस्य पदक विजेता शरद कुमार याने १.८३ मीटर उंच उडी मारली. या दोन पदकांसह भारतीय चमूच्या पदकांची संख्या १० झाली. आता भारताकडे टोक्यो पॅरालिम्पिकमध्ये २ सुवर्ण, ५ रौप्य आणि ३ कांस्य पदके आहेत.

T42 या उंच उडी प्रकारात पायात असलेल्या समस्येवर मात केलेल्या स्पर्धकांना सहभागी होता येते. मरियप्पन आणि शरद कुमार यांनी या क्रीडा प्रकारात सहभाग घेत भारताला एकाच सामन्यात दोन पदके मिळवून दिली. या सामन्यात आणखी एका भारतीयानेही सहभाग घेतला होता. २०१६च्या रियो पॅरालिम्पिक स्पर्धेत कांस्यपदकाची कमाई करणारा वरूण सिंह भाटी हा देखील स्पर्धेत होता, पण १.७७ मीटरचा मार्क पार न करता आल्याने एकूण ९ स्पर्धकांपैकी त्याचा सातवा क्रमांक लागला. पाहा भारताला दोन पदके मिळवून देणाऱ्या दोन उंच उड्या...

मरियप्पनला रौप्यपदक (Video)-

शरद कुमारला कांस्यपदक (Video)-

या दोन पदक विजेत्यांचे पंतप्रधान नरेंद्र मोदी आणि राष्ट्रपती रामनाथ कोविंद यांनी अभिनंदन केले.

टोकियो पॅरालिंपिक स्पर्धेत भारताचा स्वप्नवत प्रवास सुरू आहे. भारताने प्रथमच दुहेरी मेडल संख्या गाठली आहे. कालपर्यंत भारताच्या नावावर सात पदके होती. भाविना पटेलने टेबल टेनिसपासून केली. त्यानंतर निशाद कुमारने उंच उडीत पदक मिळवलं. अवनी लेखारा हिने तर सुवर्ण इतिहास रचला. थाळीफेकमध्ये योगेश कथुनियाने तर भालाफेकमध्ये देवेंद्र झांझरिया आणि सुंदर कुमार गुर्जरने रौप्यपदक पटकावले. विनोद कुमारनेही थाळीफेकमध्ये पदक मिळवलं होतं, पण काही तांत्रिक कारणास्तव त्याचं पदक काढून घेण्यात आले. त्यानंतर आज सिंगराज अदानाने शूटिंगमध्ये कांस्यपदक मिळवले. त्यापाठोपाठ या दोघांनी भारताला दोन पदके मिळवून दिली.