Umran Malik Indian Cricket Squad : भारताचा दक्षिण अफ्रिका दौऱ्यावरील संघ जाहीर होऊन आता बरेच दिवस झाले. मात्र संघ निवडीवरून सुरू असलेली चर्चा अजून काही संपलेली नाही. आता भारताचा माजी सलामीवीर आकाश चोप्राने भारताचा स्पीडस्टार म्हणून ओळखला जाणाऱ्या उमरान मलिकला संघात स्थान न मिळाल्याबद्दल नाराजी व्यक्त केली.

आकाश चोप्राला ज्या प्रकारे उमरान मलिकला अलगद संघातून बाहेर काढण्यात आले त्यावर आश्चर्य व्यक्त केलं आहे. उमरान मलिक फक्त भारताच्या मुख्य संघातूनच नाही तर त्याचा भारत अ संघातून देखील डच्चू देण्यात आला आहे.

आकाश चोप्राला त्याच्या यूट्यूब चॅनलवर उमरान मलिकला टी 20 वर्ल्डकप संघात स्थान मिळावे का असा प्रश्न विचारण्यात आला. त्यावेळी आकाश चोप्राने युवा स्पीडस्टारला अजून खूप काम करावं लागणार हे मान्य केलं. मात्र त्याला भारतीय अ संघात देखील स्थान मिळालं नसल्याबद्दल आश्चर्य व्यक्त केलं.

तो म्हणाला, 'उमरान मलिक हा काही महिन्यापूर्वी भारतीय संघात होता. वेस्ट इंडीज मालिकेत खेळला आणि त्यानंतर तो कुठे दिसेनासाच झाला. त्याला भारतीय संघातून दुधातून माशी काढून टाकावी तशा पद्धतीने बाहेर करण्यात आलं. मला माहिती आहे की हे योग्य उदाहरण नाही मात्र तुम्हाला याची गंभीरता लक्षात येईल.'

आकाश चोप्रा पुढे म्हणाला, 'तीन महिन्यापूर्वी भारतीय संघात असलेला खेळाडू भारतीय अ संघात देखील दिसत नाहीये हे कसं शक्य आहे. माझ्या मते हे खूप चुकीचं आहे.'