Vinesh Phogat disqualification appeal live: कुस्तीपटू विनेश फोगाट हिच्या अपात्रतेच्या निकालावर आता महत्त्वाचे अपडेट्स समोर येत आहेत. विनेश फोगाटने ५० किलो वजनी गटात सलग तीन विजय मिळवून अंतिम फेरीत आपले स्थान पक्के केले होते. पण, फायनच्या दिवशी सकाळी तिचे वजन घेतले गेले, तर ते १०० ग्रॅम जास्तीचे आढळले आणि भारतीय कुस्तीपटूला अपात्र ठरवले गेले. फायनलची स्पर्धक पासून तिला थेट शेवटच्या बाकावर बसवण्याचा निर्णय घेतला गेला. फोगाटने या विरोधात क्रीडा लवादाकडे दाद मागितली आणि उद्या याबाबतचा निर्णय येणे अपेक्षित आहे.

नेमकं घडलं तरी काय?

५० किलो वजनी गटात सलग तीन सामने खेळल्यानंतर विनेश फोगाटचे वजन दोन किलोने वाढले होते. ते कमी करण्यासाठी विनेश व तिच्या सपोर्ट स्टाफने भरपूर मेहनत घेतली. विनेश ती संपूर्ण रात्र झोपली नाही आणि दोरी उडी, धावणे, सायकल चालवणे असा व्यायाम तिने रात्रभर केला. सकाळी जेव्हा तिचे वजन केले गेले, ते १०० ग्रॅम अधिक दिसले आणि ऑलिम्पिक समितीने तिला अपात्र ठरवले. तिच्याविरुद्ध उपांत्य फेरीत पराभूत झालेल्या खेळाडूला फायनल खेळण्याची संधी दिली गेली.

विनेश फोगाटने याचिकेत काय म्हटले?

भारताची कुस्तीपटू विनेश फोगाटने तिच्यावरील अपात्रतेच्या निर्णयावर क्रीडा लवादाकडे दाद मागितली होती. विनेश फोगाटने केलेल्या अपीलमध्ये तिच्याबाबतच निर्णय येईपर्यंत फायनल थांबवावी अशी विनंती केली गेली होती. पण, लवादाने तसं करण्यास स्पष्ट नकार दिला. विनेशने किमान तिला रौप्यपदक दिले जावे अशी विनंती केली होती.

गुरुवारी सकाळी याबबातचा अंतिम निर्णय येणे अपेक्षित होते. पण, आता हाती आलेल्या वृत्तानुसार क्रीडा लवादाने तिचे अपील स्वीकारले आहे आणि उद्या भारतीय वेळेनुसार सकाळी १० वाजता निर्णय येऊ शकतो.

हरीश साळवे केस लढवणार?

CAS ने विनेश फोगाटची याचिका स्वीकारली आहे आणि सुनावणीसाठी वकिलाची नियुक्ती करण्याची सूचनाही भारतीय कुस्तीपटूला केली आहे. भारत सरकार हरीश सावळे यांना या खटल्यात सहभागी करून घेण्याचा विचार करत आहेत, असे वृत्त इंडिया टुडेने दिले आहे.

भारतीय ज्येष्ठ वकील हरीश साळवे हे भारताच्या सर्वोच्च न्यायालयात प्रॅक्टिस करतात. त्यांनी १ नोव्हेंबर १९९९ ते ३ नोव्हेंबर २००२ या कालावधीत भारताचे सॉलिसिटर जनरल म्हणून काम केले. त्यांनी आंतरराष्ट्रीय न्यायालयात (ICJ) कुलभूषण जाधव यांचा खटलाही लढवला होता.