नवी दिल्ली : दोन दिवसांपूर्वी भारताचा कर्णधार विराट कोहलीने माजी कर्णधार महेंद्रसिंह धोनी सोबतचा एक फोटो ट्विट केला होता. त्यामुळे धोनीच्या निवृत्तीच्या चर्चांना उधाण आले होते. दक्षिण आफ्रिकेविरुद्ध होणाऱ्या मालिकेपूरवी झालेल्या पत्रकार परिषदेत कोहलीने याबाबत खुलासा केला आहे.
''माझ्या मनात लांब लांबपर्यंत हा विचारही नव्हता. धोनी निवृत्ती घेतोय हा विचारही मी केला नव्हता. मी घरात बसलो होते आणि मला फक्त त्या सामन्याची आठवण आली त्यामुळे मी सहज फोटो शेअर केला. मात्र, लोकांनी त्याचा वेगळाच अर्थ लावला,'' असे स्पष्टीकरण त्याने दिले.
2016मध्ये झालेल्या ट्वेंटी20 विश्वकरंडकातील उपांत्यपूर्व फेरीतील ऑस्ट्रेलियाविरुद्धच्या सामन्यातील धोनीचा आणि त्याचा फोटो कोहलीने शेअर केला होता. या सामन्यात धोनीनं कोहलीला एकेका धावेसाठी अक्षरशः पळवलं होतं. त्यामुळे कोहलीची पुरती दमछाक झाली होती. त्यामुळेच सामन्यानंतर कोहलीनं खेळपट्टीवर गुडघे टेकले.
याच सामन्यातील त्या अखेरच्या क्षणाचा फोटो कोहलीनं शेअर केला होता. त्यात त्यानं लिहिले की,''हा सामना मी कधीच विसरणार नाही. ती अविस्मरणीय रात्र होती. माहीनं मला तंदुरुस्तीची चाचणी देत असल्यासारखे पळवले होते.'' कोहलीच्या या ट्विटनंतर धोनीच्या निवृत्तीचा चर्चांना वेग आला होता. मात्र, निवड समितीचे अध्यक्ष एमएसके प्रसाद यांनी तो निवृत्त होत नसल्याचे स्पष्ट केले.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.