अवघ्या ७८ धावांमध्ये 'टीम इंडिया'ची फलंदाजी ढेपाळली

Ind vs Eng 3rd Test: 'टीम इंडिया'साठी (Team India) तिसऱ्या कसोटीचा पहिला दिवस अतिशय विचित्र होता. भारताच्या पहिला पहिला डाव अवघ्या ७८ धावांमध्ये आटोपला. रोहित शर्मा (Rohit Sharma), विराट कोहली (Virat Kohli), चेतेश्वर पुजारा, अजिंक्य रहाणे, लोकेश राहुल, ऋषभ पंत, रविंद्र जाडेजा साऱ्याच फलंदाजांनी इंग्लंडच्या भेदक माऱ्यापुढे गुडघे टेकले. त्यामुळे भारताला शंभरीही गाठता आली नाही. भारताच्या 'फ्लॉप शो'नंतर पाकिस्तानचा माजी कर्णधार इंजमाम उल हक (Inzamam Ul Haq) रोहित आणि विराटवर चांगलाच भडकल्याचे दिसले.

रोहित शर्माने संथ खेळी करत एक बाजू लावून धरण्याचा आतोनात प्रयत्न केला. त्याने १०५ चेंडूंचा सामना करत १९ धावा केल्या. पण पुल शॉट मारताना तो झेलबाद झाला. विराटला तर तेवढीही झुंज देता आली नाही. १७ चेंडूत ७ धावा करून त्याने तंबूचा रस्ता धरला. त्याबद्दल बोलताना पाकिस्तानचा इंजमाम उल हक या दोघांवर संतापला. "विराट आणि रोहित हे महत्त्वाचे आणि बडे खेळाडू आहेत. त्यांनी जबाबादारी घेऊन खेळायला शिकलं पाहिजे. १०५ चेंडू खेळल्यानंतरही तुम्ही पिचवर सेट कसे काय होत नाही? एवढे चेंडू खेळताना केवळ १९ धावा केल्या जात असतील तर तुम्ही मध्येमध्ये धावा काढण्याचा पर्याय शोधायला हवा. विराटनेही १७ चेंडू खेळले. पण त्यात त्याला फारसं काही करता आलं नाही. ७ धावा काढून तो बाद झाला. त्याला धावा करण्यापासून रोखण्यात इंग्लंडचे गोलंदाज पूर्णपणे यशस्वी झाले", अशा शब्दात इंजमामने रोहित आणि विराटवर सडकून टीका केली.