Why Mumbai Indians Removed Rohit Sharma Captaincy : मुंबई इंडियन्सने आयपीएलच्या पुढील हंगामासाठी अष्टपैलू हार्दिक पांड्याची कर्णधार म्हणून नियुक्त केले. हार्दिकने आयपीएलच्या मागील दोन हंगामात गुजरात टायटन्सचे कर्णधारपद भूषवले. त्याच्या नेतृत्वाखाली संघाने प्रथमच चॅम्पियन होण्याचा मानही मिळवला. आता रोहित त्याच्या ज्युनियरच्या कर्णधारपदाखाली खेळणार की आयपीएलच्या पुढच्या हंगामाआधी कोणता मोठा निर्णय घेणार हे पाहणे उत्सुकतेचे ठरणार आहे.

पुढच्या वर्ल्ड कप खेळणार का रोहित?

त्याच वेळी, भारतात खेळल्या गलेल्या एकदिवसीय वर्ल्ड कपमध्ये रोहित शर्माने टीम इंडियाची धूरा सांभाळली होती. सलग 10 सामने जिंकले पण फायनलमध्ये ऑस्ट्रेलियाने बाजी मारली. रोहितने एकदिवसीय वर्ल्ड कपमध्ये 11 डावात 1 शतक आणि 3 अर्धशतकांसह 597 धावा केल्या.

पुढील वर्षी टी-20 वर्ल्ड कप अमेरिका आणि वेस्ट इंडिजमध्ये होणार आहे. रोहित शेवटच्या टी-20 वर्ल्ड कपपासून म्हणजेच नोव्हेंबर 2022 पासून या फॉरमॅटमध्ये टीम इंडियासाठी एक पण सामना खेळला नाही. आता आगामी टी-20 वर्ल्ड कपमध्ये रोहितच्या खेळण्यावरही प्रश्नचिन्ह उपस्थित झाले आहेत.

कर्णधारपद का हिसकावले?

रोहितकडून मुंबई इंडियन्सचे कर्णधारपद हिसकावून घेण्यामागे कोणतेही मोठे कारण समोर आलेले नाही, परंतु तो या फॉरमॅटपासून लांब जाताना दिसत आहे. वर्ल्ड कपनंतर भारत आणि दक्षिण आफ्रिका यांच्यातील कसोटी मालिकेतून तो मैदानात परतणार आहे.

कसोटी संघाचे कर्णधारपदही तो सांभाळणार आहे. आता असे दिसते आहे की रोहितच्या नेतृत्वाखाली भारत पुढील टी-20 वर्ल्ड कप खेळणार नाही. एकतर हार्दिककडे कमान सोपवली जाईल किंवा रोहितच्या निर्णयाची प्रतीक्षा केली जाईल.

कर्णधार रोहित शर्माच्या नेतृत्वाखाली मुंबई 5 वेळा चॅम्पियन

मुंबई इंडियन्स संघ हा या लीगमधील सर्वात यशस्वी संघांपैकी एक आहे. त्याने 1-2 नव्हे तर 5 वेळा आयपीएल ट्रॉफी जिंकली आहे. आश्चर्याची गोष्ट म्हणजे रोहित शर्मा पाचही वेळा कर्णधार होता. एवढेच नाही तर मुंबईला 10 वेळा प्लेऑफचे तिकीट मिळाले आहे. या संघाने 2013 मध्ये पहिले विजेतेपद पटकावले होते. यानंतर त्याने 2015, 2017, 2019 आणि 2020 मध्ये आयपीएल ट्रॉफी जिंकली.