भारत आणि वेस्ट इंडिज यांच्यात आज महिला वर्ल्ड कपमधील तिसरा सामना झाला. या सामन्यात भारताने वेस्ट इंडिजवर १५५ धावांनी दणणीत विजय मिळवला. याआधी भारतीय महिला संघाने पाकिस्तानला पराभूत केलं होतं तर न्यूझिलंडविरोधात भारताला पराभव पत्करावा लागला होता. वेस्ट इंडिजने त्यांचे आधीचे दोन्ही सामने जिंकले होते. तिसऱ्या सामन्यात भारताने नाणेफेक जिंकून प्रथम फलंदाजीचा निर्णय़ घेतला. यामध्ये भारताने स्मृती मानधना आणि हरमनप्रीत यांच्या शतकांच्या जोरावर ८ बाद ३१७ धावा केल्या. त्यानंतर वेस्ट इंडिजला १६२ धावांनी गुंडाळून वर्ल्ड कपमध्ये मोठ्या विजयाची नोंद केली.

प्रथम फलंदाजीला मैदानात उतरलेल्या भारताला आव्हानात्मक धावसंख्या उभारू देण्यात स्मृती मानधना आणि हरमनप्रीत यांनी मोठी कामगिरी बजावली. स्मृती मानधनाने ११९ चेंडूत १२३ धावा केल्या. तर हरमनप्रीतने १०७ चेंडूत १०९ धावांची धडाकेबाज खेळी केली. त्यानंतर गोलंदाजीत स्नेह रानाने सर्वाधिक ३ तर मेघना सिंहने २ विकेट घेतल्या. वेस्ट इंडिजचा डाव ४०.३ षटकात १६२ धावांत आटोपला.