T20 WC INDW vs AUSW : भारताने ऑस्ट्रेलियाच्या 173 धावांचे आव्हान पार करताना झुंजार वृत्ती दाखवत 167 धावांपर्यंत मजल मारली. भारताची कर्णधार हरमनप्रीत कौरने 52 धावांची झुंजार अर्धशतकी खेळी केली. मात्र 15 व्या षटकात दुसरी धाव घेताना हरमनप्रीतची बॅट अडकली अन् ती धावबाद झाली. भारताने सामना तिथेच हरला. भारताकडून जेमिमाह रॉड्रिग्जने 24 चेंडूत 43 धावांची आक्रमक खेळी करत हरमनला चांगली साथ दिली.

तत्पूर्वी, ऑस्ट्रेलियाने महिला टी 20 वर्ल्डकपच्या सेमी फायनल सामन्यात प्रथम फलंदाजी करत भारतासमोर 173 धावांचे तगडे आव्हान ठेवले. ऑस्ट्रेलियाकडून बेथ मूनीने 54 धावांची अर्धशतकी तर कर्णधार मेघ लेनिंगने नाबाद 49 धावांची दमदार खेळी केली. याचबरोबर अॅश्लेघ गार्डनेर 18 चेंडूत 31 धावा चोपल्या. भारताकडून शिखा पांडेने 2 विकेट्स घेतल्या.

19 वे षटक टाकणाऱ्या जोनासेनने स्नेह राणाला बाद करत फक्त 4 धावा दिल्या. यामुळे शेवटच्या षटकात भारताला विजयासाठी 16 धावांचे टार्गेट आले.

हरमन बाद झाल्यानंतर रिचा 17 चेंडूत 14 धावा करून बाद झाली. यामुळे चेंडू आणि धावांमधील अंतर देखील वाढले.

भारताची कर्णधार हरमनप्रीत कौर अर्धशतकानंतर विचित्र पद्धतीने धावबाद झाली. तिची बॅट अडकल्यामुळे ती क्रीजमध्ये वेळेत पोहचू शकली नाही.

जेमिमाह रॉड्रिग्ज बाद झाल्यानंतर भारताची धावगती मंदावली. हरमनप्रीत कौर आणि रिचा घोष यांनी भारताला 13 षटकात 4 बाद 111 धावांपर्यंत मजल मारली.

आज भलत्याच लयीत असलेल्या जेमिमाह रॉड्रिग्जने आक्रमक फलंदाजी करत 24 चेंडूत 43 धावा चोपल्या. मात्र तिला डार्सी ब्राऊनने 11 व्या षटकात बाद करत हरमन - जेमिमाहची 69 धावांची भागीदारी तोडली.

भारताची अवस्था 3 बाद 28 धावा अशी झाली असताना जेमिमाह रॉड्रिग्ज आणि हरमनप्रीत कौरने चौथ्या विकेटसाठी नाबाद 65 धावांची भागीदारी रचली. या दोघांनी भारताला 10 षटकात 93 धावांपर्यंत पोहचवले.

ऑस्ट्रेलियाने 173 धावांचे मोठे आव्हान ठवेल्यानंतर भारताने पहिल्या चेंडूपासूनच आक्रमक खेळण्याचा प्रयत्न केला. मात्र स्मृती मानधना 2 शफाली वर्मा 9 तर यस्तिका भाटिया 4 धावा करून बाद झाल्या.

मात्र त्यानंतर हरमनप्रीत कौर आणि जेमिमाह रॉड्रिग्जने फटकेबाजी करत पॉवर प्लेमध्येच 59 धावांपर्यंत मजल मारली.

ऑस्ट्रेलियाची 52 धावांची सलामी देणारी जोडी अखेर राधा यादवने फोडली. तिने एलिसा हेलेला 25 धावांवर बाद केले.

पहिल्या तीन षटकात सावध फलंदाजी करणाऱ्या बेथ मूनीने आक्रमक पवित्रा घेतला. तिने हेलेच्या साथीने आठव्या षटकात अर्धशतकी मजल मारून दिली.

नाणेफेक जिंकून प्रथम फलंदाजी करताना पहिल्या तीन षटकात बिनबाद 21 धावा केल्या. एलिका हेलेने आक्रमक फलंदाजी केली तर बेथ मूनीने तिला सावध साथ दिली.

हरमनप्रीत कौरच्या फिटनेसबाबत साशंकता होती. आजचा सामना हरमनप्रीत कौर खेळणार की नाही अशी चर्चा असतानाच कर्णधार नाणेफेकीसाठी मैदानात उतरली.

ऑस्ट्रेलियाने भारताविरूद्धच्या सेमी फायनल सामन्यात नाणेफेक जिंकून प्रथम फलंदाजी करण्याचा निर्णय घेतला.

भारत आणि ऑस्ट्रेलिया यांच्यातील सेमी फायनल सामन्याला थोड्याच वेळात सुरूवात होणार आहे. नाणेफेकीपूर्वी भारतीची कर्णधार हरमनप्रीत कौर आणि उपकर्णदार स्मृती मानधना यांनी खेळपट्टीची पहाणी केली.