माऊंट माऊनगनुई : आयसीसी महिला वर्ल्डकप (Women's World Cup 2022) स्पर्धेत आज भारताला (India Women) गेल्या वर्ल्डकप फायनलचा बदला घेण्याची संधी होती. मात्र गतविजेत्या इंग्लंडने (England Women) भारतीय फलंदाजीचे कंबरडे मोडून सामन्यावर चांगली पकड निर्माण केली आहे. नाणेफेक जिंकून प्रथम फलंदाजी करणाऱ्या भारताचा संपूर्ण संघ 134 धावात ढेर झाला.

सलामीवीर स्मृती मानधनाची (Smriti Mandhana) 35 धावांची खेळी समाप्त झाल्यानंतर भारताची घसगुंडी उडाली. भारताची अवस्था 3 बाद 61 धावांवरून 7 बाद 86 अशी बिकट झाली. त्यामुळे भारत शंभरी तरी पार करू शकेल का अशी शंका निर्माण झाली होती. मात्र त्यानंतर विकेटकिपर रिचा घोष आणि झुलन गोस्वामी यांनी आठव्या विकेटसाठी अर्धशतकी भागीदारी रचत भारताला शंभरच्या पार पोहचवले.

मात्र 33 धावांची खेळी करणारी रिचा धावबाद झाली आणि ही जोडी फटली. त्यानंतर 20 धावा करणारी झुलन गोस्वामी देखील बाद झाली. अखेर भारताचा डाव 134 धावात आटोपला. इंग्लंडकडून कार्लेट डेनने भेदक मारा करत 23 धावात 4 बळी टिपले. तर अॅनाने देखील दोन विकेट घेत तिला चांगली साथ दिली.