Pakistan Women vs India Women : न्यूझीलंडच्या मैदानात सुरु असलेल्या महिला वर्ल्ड कप स्पर्धेत भारत आणि पाकिस्तान यांच्यात हायहोल्टेड ड्रामा रंगला होता. या सामन्यात भारतीय महिला संघाने 107 धावांनी विजय मिळवत स्पर्धेची सुरुवात विजयाने केली. मैदानात एकमेकांच्या विरोधात ठाकलेल्या खेळाडूंनी फिल्ड बाहेर पडताच प्रेमाचा अनोखा संदेश दिल्याचे पाहायला मिळाले. आयसीसीने आपल्या अधिकृत ट्विटर अकाउंटवर हा खास क्षण शेअर केला आहे.

पाकिस्तानची बॅटर आणि कर्णधार बिस्माह मारुफ (Pakistan captain Bismah Maroof ) ही आपल्या चिमुकल्या मुलीसह स्पर्धेत सहभागी झाली आहे. भारत आणि पाकिस्तान यांच्यातील माउंट माउंनगुनाईच्या मैदानात झालेल्या सामन्यानंतर भारतीय महिला संघातील खेळाडूंनी बिस्माह मारुफची चिमुकली फतिमासह सेल्फी घेतला. हा आयसीसीने आपल्या अधिकृत अकाउंटवरुन शेअर केला आहे. टीम स्पिरीटचा फतिमासाठी पहिला धडा, असे खास कॅप्शनही आयसीसीने दिले आहे.