कैरो (इजिप्त) : भारताच्या नेमबाजीतील नवा स्टार ठाण्याच्या रुद्रांक्ष पाटीलने आपल्या यशाची पताका पुन्हा एकदा फडकावली. येथे सुरू असलेल्या जागतिक अजिंक्यपद नेमबाजीत सुवर्णपदक तर जिंकलेच, पण त्याचबरोबर पुढील वर्षी होणाऱ्या पॅरिस ऑलिंपिकचा कोटाही मिळवला.गेल्या काही महिन्यांपासून कमालीच्या फॉर्मात असलेल्या १८ वर्षांच्या रुद्रांक्षने १० मीटर एअर रायफलच्या अंतिम सामन्यात इटलीच्या डॅनिलो डेनिस सोलाझोचा १७-१३ असा पराभव केला.

वय वर्ष केवळ १८ असलेला रुद्रांक्ष सिनियर गटाच्या जागतिक अजिंक्यपद स्पर्धेत प्रथम खेळत आहे. पात्रता फेरीत त्याने ६३३.९ गुण मिळवून पहिले स्थान मिळवत आपल्या क्षमतेची चुणूक दाखवली. विशेष म्हणजे हे यश मिळवताना त्याने चायनाच्या दोन नेमबाजांना पाठीमागे टाकले. यात विद्यमान विश्वविजेत्या आणि ऑलिंपिक विजेत्या यांग होरान याचा समावेश आहे.पॅरिस ऑलिंपिकसाठी नेमबाजीत भारताला मिळालेला हा दुसरा कोटा आहे. भोवनेश मेंदिराताने ट्रॅप इव्हेंटमध्ये पहिला कोटा मिळवला. शॉर्टगन जागतिक अजिंक्यपद स्पर्धा क्रोएशियात झाली होती.

रुद्रांक्षने शेंग लिहो याला ०.१ गुणांनी मागे टाकले आणि तो २६१.९ गुणांसह सुवर्णपदकाच्या सामन्यासाठी पात्र ठरला. या लिहोला ब्राँझपदकावर समाधान मानावे लागले; तर विश्वविजेता होरान चौथा आला.अंजूम मोदगिल हिने अशाच जागतिक स्पर्धेत महिलांच्या एअर रायफलमध्ये रौप्यपदक जिंकून टोकियो ऑलिंपिकसाठी पात्रता मिळवली होती.

कैरोतील या स्पर्धांत भारत पदकांच्या शर्यतीत चीननंतर दुसऱ्या स्थानावर आहे. रुद्रांक्ष सुवर्णपदकाची कामगिरी करत असताना ५० मीटर रायफल प्रोन मिश्र प्रकारात निश्चल आणि सूर्या प्रतापसिंग यांना ब्राँझपदकावर समाधान मानावे लागले. अमेरिकेच्या जोडीकडून त्यांचा ६-१६ असा पराभव झाला. अभिवनच्या पंक्तीत रुद्रांक्षचे हे यश अभूतपूर्व आहे. एअर रायफलमध्ये सुवर्णपदक जिंकणारा तो दुसरा भारतीय आहे. याअगोदर २००६ मध्ये अभिवन बिंद्राने सुवर्णपदक जिंकले होते.