World Cup 2023 Points Table Afghanistan : अफगाणिस्तानने पाकिस्तान क्रिकेट संघावर विजय मिळवत वर्ल्ड कपमध्ये इतिहास रचला. अवघ्या 10 दिवसांत अफगाणिस्तान संघाने दोन मोठ्या संघांना पराभूत करून आयसीसी एकदिवसीय वर्ल्ड कप मध्ये अपसेट निर्माण केले. आधी विश्वविजेत्या इंग्लंड आणि नंतर पाकिस्तान संघाचा पराभव केला. या सामन्यानंतर गुणतालिकेत मोठी उलथापालथ झाली.

रविवार 23 ऑक्टोबर हा दिवस केवळ आयसीसी एकदिवसीय वर्ल्ड कपसाठीच नाही तर अफगाणिस्तान क्रिकेटच्या इतिहासासाठीही एक मोठा संस्मरणीय दिवस ठरला. या संघाने पाकिस्तानविरुद्ध एकदिवसीय सामन्यात पहिला विजय नोंदवला. नाणेफेक जिंकल्यानंतर बाबर आझमने अफगाणिस्तानविरुद्ध प्रथम फलंदाजी करण्याचा निर्णय घेतला.

कर्णधार बाबरसह अब्दुल्ला शफीकने अर्धशतकी खेळी खेळून संघाला 282 धावांपर्यंत नेण्यात महत्त्वाची भूमिका बजावली. अफगाणिस्तानच्या नूर अहमदने 3 विकेट घेतल्या. लक्ष्याचा पाठलाग करताना इब्राहिम झदरन आणि रहमानउल्ला गुरबाज यांनी स्फोटक सलामी देत ​​विजयाचा पाया रचला आणि रहमत शाहने कर्णधार हशमतुल्लासह संघाला विजयापर्यंत नेले. संघाने 49 षटकात 2 गडी गमावून विजय नोंदवत इतिहास रचला.

अफगाणिस्तानने वर्ल्ड कप स्पर्धेत पाकिस्तान संघाचा पराभव करत गुणतालिकेत मोठी झेप घेतली. दहाव्या क्रमांकावर असलेल्या या संघाने थेट सहाव्या क्रमांकावर कब्जा केला आहे. पाकिस्तानचा संघ पाचव्या स्थानावर असला तरी इंग्लंडने तळ गाठला आहे. 5 पैकी 5 जिंकून भारतीय संघ अव्वल स्थानावर आहे, तर न्यूझीलंड संघ दुसऱ्या आणि दक्षिण आफ्रिकेचा संघ तिसऱ्या क्रमांकावर आहे. सलग दोन सामने जिंकून ऑस्ट्रेलिया आता चौथ्या स्थानावर पोहोचला आहे.