World Cup 2023 Australia vs England : ऑस्ट्रेलियाने शनिवारी रात्री इंग्लंडवर ३३ धावांनी विजय मिळवत एकदिवसीय विश्‍वकरंडकातील उपांत्य फेरीच्या दिशेने दमदार पाऊल टाकले. कांगारूंच्या या विजयात ॲडम झॅम्पाने अष्टपैलू कामगिरी करीत मोलाचा वाटा उचलला. सुरुवातीला निर्णायक क्षणी २९ धावांची खेळी साकारणाऱ्या झॅम्पाने नंतर २१ धावा देत तीन फलंदाज बाद केले. एक अप्रतिम झेलही टिपला. सामनावीर म्हणून त्याच्याच नावावर शिक्कामोर्तब करण्यात आले. याच पार्श्वभूमीवर त्याने सर्व बाजूंनी समाधान देणारा सामना ठरला असल्याचे आवर्जून सांगितले.

ॲडम झॅम्पा पुढे म्हणाला, प्रामाणिकपणे सांगायचे झाल्यास इंग्लंडविरुद्धच्या लढतीतील कामगिरीने मनापासून समाधान मिळाले. मिचेल स्टार्कसोबत महत्त्वपूर्ण भागीदारी करता आली. जास्तीत जास्त षटके फलंदाजी करण्याचा प्रयत्न केला. त्यामध्ये यश मिळाले. त्यानंतर डेव्हिड विलीचा झेल घेता आला. अव्वल क्षेत्ररक्षण करणाऱ्या खेळाडूंमध्ये माझे नाव घेतले जात नाही; पण मला तो झेल घेता आला, याचा आनंद आहे.

पराभवानंतर इंग्लंडचा कर्णधार जॉस बटलर म्हणाला, सातत्याने होणाऱ्या पराभवांमुळे निराशा वाढत चालली आहे; पण माझ्या संघावरील विश्‍वास कायम आहे. याच संघाने विश्‍वकरंडक पटकावला आहे. हे चॅम्पियन खेळाडू आहेत. तसेच नेतृत्वामुळे माझ्या फलंदाजीवर परिणाम झालेला नाही.

डावखुऱ्या फलंदाजांना गोलंदाजी करण्यात यश

ॲडम झॅम्पा नमूद करतो की, गोलंदाजीत मला छान कामगिरी करता आली. माझ्या १० षटकांमध्ये २१ धावाच देता आल्या. यावरून माझ्या गोलंदाजीचा टप्पा व दिशा योग्य होती हे समजते. तसेच बहुतांशी वेळा डावखुऱ्या गोलंदाजांना गोलंदाजी केली. डेव्हिड मलान, बेन स्टोक्स व मोईन अली या अनुभवी फलंदाजांसमोर प्रभावी कामगिरी करता आली. ऑस्ट्रेलियन संघासाठी योगदान देता आले. याचे समाधान आहे. कसोटी क्रिकेटसाठी अद्याप निवड झालेली नाही; पण माझ्याकडे पुरेसा वेळ आहे. या विश्‍वकरंडकानंतर पुढल्या वर्षी टी-२० विश्‍वकरंडक आहे. त्यासाठी सज्ज व्हायचे आहे, असे तो म्हणाला.