Yashasvi Jaiswal Double Century : भारतीय संघाचा युवा सलामीवीर यशस्वी जैस्वालने आपल्या करिअरची दमदार सुरुवात केली आहे. टीम इंडियाच्या स्टारने अवघ्या सहाव्या कसोटी सामन्यात पहिले कसोटी द्विशतक ठोकले आहे.

यशस्वी जैस्वालने 277 चेंडूत आपले द्विशतक पूर्ण केले आहे. कसोटीत भारतासाठी द्विशतक झळकावणारा तो तिसरा सर्वात तरुण भारतीय फलंदाज ठरला आहे. त्याच्या आधी विनोद कांबळीने वयाच्या 21व्या वर्षी दोन द्विशतके झळकावली होती. त्याचवेळी सुनील गावसकर यांनी वयाच्या 21व्या वर्षी द्विशतक झळकावले होते. आता यशस्वीने वयाच्या 22 व्या वर्षी ही कामगिरी केली आहे.

पहिल्या कसोटी सामन्यातील पराभवानंतर दुसऱ्या कसोटीत भारतीय फलंदाज दमदार पुनरागमन करतील असे वाटत होते. मात्र जैस्वाल सोडला तर एकाही फलंदाजाला अर्धशतक करता आले नाही. अशा परिस्थितीत जैस्वालची ही खेळी सर्वात खास आहे. यशस्वीने भारतीय भूमीवर पहिले शतक झळकावले आणि आता त्याच शतकाचे दुहेरी शतकात रूपांतर केले आहे. या खेळीदरम्यान जैस्वालच्या बॅटमधून 19 चौकार आणि 7 षटकार आले. तो 290 चेंडूत 209 धावा करून बाद झाला.

यशस्वीचा पदार्पणात धमाका...!

गेल्या वर्षी जुलैमध्ये वेस्ट इंडिजविरुद्ध कसोटी क्रिकेटमध्ये पदार्पण करताना यशस्वी जैस्वालने 171 धावांची खेळी खेळून आपल्या कारकिर्दीची शानदार सुरुवात केली होती. 387 चेंडूंचा सामना करत या तरुणाने 16 चौकार आणि 1 षटकाराच्या मदतीने ही संस्मरणीय खेळी खेळली होती. या सामन्याच्या दुसऱ्या डावातही यशस्वीने अर्धशतक झळकावले होते.