Yashasvi Jaiswal : एशियन गेम्समधील आपल्या पहिल्याच सामन्यात भारतीय पुरूष क्रिकेट संघाने दादागिरी केली. नाणेफेक जिंकून प्रथम फलंदाजी घेतलेल्या भारताने 10 व्या षटकातच आपले शतक धावफलकावर लावले.

भारताचा सलामीवीर यशस्वी जैसवालने तर तुफानी तडाखे दिले. यशस्वी जैसवालने 22 चेंडूत अर्धशतक ठोकले. या अर्धशतकात 5 षटकार आणि 5 चौकारांचा समावेश होता. त्याच्या जोडीला असलेल्या ऋतुराजने एक बाजू लावून धरली होती.

एशियन गेम्स 2023 मध्ये पुरूष क्रिकेट क्रीडा प्रकारात भारतीय संघ सुवर्ण पदकाचा प्रबळ दावेदार आहे. महिला संघाने सुवर्ण पदकाची कमाई करत आपला दबदबा सिद्ध केला. आजपासून पुरूष संघाने आपली सुवर्ण पदक पटकावण्याची मोहीम सुरू केली.

नेपाळविरूद्धच्या पहिल्या सामन्यात भारताने नाणेफेक जिंकून प्रथम फलंदाजी करण्याचा निर्णय घेतला. संथ खेळपट्टीवर नवीन चेंडूवर ऋतुराज गायकवाड आणि यशस्वी जैसवाल यांनी 10 षटकात शतकी सलामी दिली. यात सर्वात मोठा वाटा हा यशस्वी जैसवलाचा होता. त्याने 22 चेंडूतच अर्धशतक ठोकले.

मात्र 10 षटकानंतर भारताचा डाव घसरला. 23 चेंडूत 25 धावा करणाऱ्या ऋतुराजने आपली धावगती वाढवण्यास सुरूवात केली मात्र त्याला दिपेंद्र सिंहने बाद करत भारताला पहिला धक्का दिला.

103 धावांवर पहिली विकेट गेल्यानंतर भारतीय संघाच्या मधल्या फळीने देखील हाराकिरी केली. तिलक वर्मा अवघ्या 2 धावांची भर घालून परतला तर जितेश शर्माला देखील संधीचं सोनं करता आलं नाही. तो 5 धावा करून बाद झाला.

दुसऱ्या बाजूने सेट झालेला यशस्वी जैसवाल 200 च्या स्ट्राईक रेटने धावा करण्यास सुरूवात केली.