भारताने तिसऱ्या टी-20 सामन्यात श्रीलंकेचा ९१ धावांनी पराभव केला आहे. या विजयासह भारताने ३ टी-20 सामन्यांची मालिका २-१ अशी खिशात घातली. विशेष म्हणजे या विजयात धडाकेबाज फलंदाज सुर्यकुमार यादवची मोलाची कामगिरी ठरली. सुर्याने शतक केले. या शतकी खेळीनंतर त्याने अनेक विक्रम आपल्या नावावर केले. दरम्यान, फिरकी गोलंदाच युज्वेंद्र चहल आणि सुर्यकुमारचा एक व्हिडीओ सोशल मीडियावर तुफान व्हायरल होताना दिसत आहे.

सोशल मीडियावर तुफान व्हायरल होणाऱ्या व्हिडीओमध्ये सुर्यकुमार यादव हर्षा भोगलेसोबत चर्चा करताना दिसत आहे. दरम्यान, चहल येतो आणि थेट सुर्यकुमारच्या जवळ येत त्याच्या हाताला चुंबन करतो. चहलने केलेलं हे कृत्य पाहून नेटकरी जाम खुश झालेत. चहलचा हा व्हिडीओ व्हायरल होत असून त्याच्यावर कमेंट्सचा पाऊस पडत आहे.

PCB घेणार मोठा निर्णय; अफ्रिदी होणार निवड समितीचा अध्यक्ष

भारतीय संघाच्या विजयाचा हिरो शतक झळकावणारा सूर्यकुमार यादव ठरला. चौथ्या क्रमांकावर फलंदाजीसाठी उतरलेल्या सूर्यकुमारने ५१ चेंडूत ११२ धावा करत श्रीलंकेच्या गोलंदाजांची जबरदस्त धुलाई केली. सूर्याने ९ षटकार आणि ७ चौकार लगावले. सूर्यकुमार यादवचे टी20 आंतरराष्ट्रीय कारकिर्दीतील हे तिसरे शतक होते.

सूर्याचे टी-20 आंतरराष्ट्रीय क्रिकेटमधील पहिले शतक गेल्या वर्षी जुलैमध्ये नॉटिंगहॅमच्या मैदानावर झळकले होते. त्यावेळी त्याने इंग्लंडविरुद्ध ११७ धावांची खेळी खेळली. त्यानंतर नोव्हेंबर २०२२ मध्ये, सूर्यकुमार यादवने न्यूझीलंडविरुद्ध माऊंट मौनगानुई येथे नाबाद १११ धावांची खेळी केली. म्हणजेच सूर्यकुमारने आधी इंग्लंडमध्ये, नंतर न्यूझीलंडमध्ये आणि आता आपल्या घरच्या मैदानावर टी-20 आंतरराष्ट्रीय सामन्यात शतक झळकावले आहे. सूर्यकुमार यादव सध्या ICC T20 क्रमवारीत नंबर १ फलंदाज आहे.