Zimbabwe Vs Bangladesh T20 World Cup 2022 : टी 20 वर्ल्डकप 2022 मधील ग्रुप 2 मधील बांगलादेश विरूद्ध झिम्बाब्वेच्या सामन्यात झुंजार झिम्बाब्वेने पुन्हा एकदा आपला दम दाखवून दिला. या सामन्यात देखील नो बॉल नाट्य पहावयास मिळाले. मात्र बांगलादेशने शेवटच्या चेंडूवर सामना 3 धावांनी जिंकला. बांगलादेशचे 151 धावांचे आव्हान घेऊन मैदानात उतरलेल्या झिम्बाब्वेने खराब सुरूवातीनंतरही शेवटच्या चेंडूपर्यंत झुंज दिली.

झिम्बाब्वेने प्रथम फलंदाजी करणाऱ्या बांगलादेशला 150 धावात रोखले. झिम्बाब्वेने त्यानंतर 5 बाद 69 धावा अशा खराब सुरूवातीनंतर डाव सावरत शेवटच्या 3 षटकात तुफान फटकेबाजी केली. यामुळे बांगलादेशच्या ह्रदयाचे ठोके वाढले होते. मात्र कर्णधार शाकिब - अल - हसनने झिम्बाब्वेच्या सेन विलियम्सची 42 चेंडूत केलेली 64 धावांची झुंजार खेळी संपवली. बांगलादेश सामना जिंकणार आणि हा सामन्याचा टर्निंग पॉईंट ठरणार असे वाटत होते. मात्र शेवटच्या षटकात वेगळाच थरार पहायला मिळाला.

झिम्बाब्वेला शेवटच्या षटकात विजयासाठी 16 धावांची गरज असताना झिम्बाब्वेच्या नागारवाने तिसऱ्या आणि चौथ्या चेंडूवर एक षटकार एक चौकार मारले. सामना दोन चेंडूत 5 धावा असा आला असताना शेवटचे षटक टाकणाऱ्या मोसादेक हुसैनने शेवटच्या दोन चेंडूवर दोन विकेट घेतल्या. बांगलादेशला हुसैनने सामना जिंकून दिला असे चित्र निर्माण झाले असताना शेवटच्या चेंडूवर मात्र विकेटकिपरने स्टम्पिंग करताना चेंडू स्टम्पच्या पुढे पकडल्याने अंपायर रिव्ह्यूमध्ये हा नो बॉल देण्यात आला. दरम्यान, दोन्ही संघ पॅव्हेलियनमध्ये पोहचले होते. त्यामुळे झिम्बाब्वेला शेवटच्या चेंडूवर (फ्री हिट) विजयासाठी 4 धावांची गरज होती. बांगलादेशला फक्त या चेंडूवर चौकार द्यायचा नव्हता. स्ट्राईकवर असलेला मुझारबानीने मिळालेली संधी दवडली. तो मोठा फटका मारण्याच्या नादात चेंडू हुकला आणि बांगलादेशने 3 धावांनी सामना जिंकला.