मुंबई : आपण अनेकदा जुन्या माणसांच्या तोंडी ऐकल असेल की माणूस घरी आला की त्याला गूळ पाणी द्यावं, किंवा जेवणाच्या ताटात एका बाजूला गुळाचा खडा ठेवावा. कारण, गूळ खाणं आरोग्यासाठी खूप चांगल आहे. हिवाळ्यात गुळाचा चहा प्यायल्याने अनेक आजारांचा धोकाही कमी होतो. वजन कमी करण्यासाठी देखील साखरेच्या जागी गुळाचा वापर करता येतो.

गुळापासून फक्त चहाच बनवता येत नाही तर अनेक गोड पदार्थ बनवण्यासाठी गुळाचा वापर केला जातो. यामुळे निरोगी राहण्यासोबतच वजन वाढण्याचा धोका उरत नाही. पण जर गूळ शुध्द असेल तेव्हाच हे फायदे मिळतात. नकली गूळ खाल्ल्याने तुमच्या आरोग्याच्या अनेक समस्या उद्भवू शकतात.

शुध्द गूळ ओळखण्याच्या कोणत्या पद्धती आहेत-

1. चवीवरून ओळखा

सर्व प्रथम गुळाला टेस्ट करा, जर गुळाची चव किंचित खारट किंवा कडू वाटली तर समजून घ्या की गूळ शुद्ध नाही. शुध्द गूळ चवीला गोड असतो.

2. गुळाचा रंग

शुध्द गुळाची ओळख म्हणजे तो गडद तपकिरी रंगाचा दिसतो. गुळ स्वच्छ करण्यासाठी अनेक प्रकारची रसायने मिसळली जातात जेणेकरून त्याला हलका तपकिरी रंग येतो. पण त्याचे वजन वाढवण्यासाठी त्याला पॉलिश करण्याबरोबरच इतर गोष्टींमध्येही भेसळ केली जाते.

3. पाण्याने ओळखा

बनावट गूळ गोड करण्यासाठी त्याच्यात साखरेचे स्फटिक टाकले जातात. ते ओळखण्यासाठी तुम्ही गूळ पाण्यात मिक्स करा, जर गूळ तरंगला तर समजा कि शुध्द गूळ आहे. जर गूळ पाण्यात खाली स्थिरावला तर त्यात अनेक प्रकारची भेसळ आहे.