केसांची निगा राखण्यासाठी आपण अनेक उपाय करतो. केसांना तेलाने मालिश करतो, हेअर पॅक किंवा हेअर मास्कचा वापर करतो, उत्तम प्रकारचे शॅंम्पू-कंडिशनर वापरतो. हे सर्व करूनही केस गळणे, केस पातळ होणे, इत्यादी अनेक समस्या जाणवतात.

यामागे खरं तर अनेक कारणे असू शकतात. केस धुतल्यानंतर केसांची योग्य प्रकारे काळजी न करणे हे एक कारण प्रामुख्याने असू शकतं. केस धुतल्यानंतर केसांची नीट काळजी घेणे हे अतिशय महत्वाचे आहे. आज आपण केस धुतल्यानंतर केसांची काळजी कशी घ्यावी ? याबद्दल जाणून घेणार आहोत.

केस धुतल्यानंतर केसांची काळजी कशी घ्यावी ?

केस सुकवणे

शॅंम्पूने केस धुतल्यानंतर हे ओले केस चांगल्या प्रकारे सुकवणे हे अतिशय महत्वाचे आहे. आजकाल केस सुकवण्यासाठी हेअर ड्रायरचा वापर करण्याचे प्रमाण वाढले आहे. मात्र, हे नेहमी करणे टाळले पाहिजे. अगदीच घाई गडबड असेल तरच केस हेअर ड्रायरने सुकवावे.

इतर वेळी केस सुकवण्यासाठी टॉवेलचा वापर करावा. टॉवेलने केस चांगल्या प्रकारे कोरडे करून घ्यावे. त्यानंतर, ते थोडावेळ मोकळे सोडावेत. जेव्हा केस चांगल्या प्रकारे सुकतील तेव्हाच ते बांधावे. लक्षात ठेवा, ओले केस असतील तर ते लगेच बांधणे टाळा. अन्यथा ते जास्त प्रमाणात खराब होतील.

केस चांगले विंचरून घ्या

केस कोरडे केल्यानंतरच केस कंगव्याने विंचरणे योग्य ठरते. ओल्या केसांमध्ये कंगवा फिरवल्याने केस तुटण्याची शक्यता अधिक असते. त्यामुळे, केस कोरडे केल्यानंतर ते हळूहळू विंचरून घ्या.

केस विंचरण्यासाठी रूंद दातांचा कंगवा वापरा. या कंगव्याच्या मदतीने हळूवारपणे केस विंचरून घ्या. केस कोरडे झाल्यानंतर केस विंचरल्याशिवाय कोणतीही हेअरस्टाईल करू नका. जर असे केले तर, केसांमध्ये गुंता होण्याची शक्यता असते आणि केस गळण्याची भीती देखील असते.

केसांना हेअर सीरम लावा

केस धुतल्यानंतर केसांवर लगेच हेअर सीरम लावा. केस कोरडे केल्यानंतर आणि कंगव्याने विंचरून घेतल्यानंतर ही तुम्ही हेअर सीरम लावू शकता. हेअर सीरमचे ३-४ थेंब केसांमध्ये लावा. हेअर सीरम टाळूला चुकूनही लावू नका. टाळूला लावल्यास केस अधिक तेलकट होतील, त्यामुळे केसांच्या बटांनाच फक्त हेअर सीरम लावा.

हेअर सीरम लावल्याने केस मऊ होतात आणि चमकदार दिसतात. शिवाय, केसांमध्ये गुंता होत नाही आणि हेअर सीरम केसांमध्ये दिवसभर राहू शकते.