हल्ली फक्त चेहऱ्यावरचेच नाही तर संपूर्ण अंगावरचे केस काढणं ही फक्त फॅशन उरलेली नाही तर ट्रेंड झाला आहे. जर तुम्ही वॅक्स, थ्रेडींग नाही केलं म्हणजे तुम्ही गावंढळ आहात असा शिक्का मारला जातो. मग त्यासाठी फुल बॉडी वॅक्स करण्यावर महिला, मुली आग्रह धरतात. Side Effects of Bikini Wax

सर्वात आधी बिकिनी वॅक्स म्हणजे नक्की काय हे माहीत नसलेल्या लोकांसाठी हा काय प्रकार आहे हे समजावून सांगूया.तर मंडळी योनीमार्गाच्या आसपास असलेला एक न एक केस वॅक्सिंग करून काढून टाकणे जेणेकरून बिकिनी घातली तरी काहीही दिसू नये हा बिकिनी वॅक्स चा उद्देश असतो.हा भाग अतिशय नाजूक आणि संवेदनशील असल्याने साहजिकच ही प्रक्रिया करून घेणे चांगलेच वेदनादायक असते. (Bikini Wax Hazards)

तरीही बऱ्याच तरुण मुली आणि काही वयाने मोठ्या स्त्रियाही हे नियमित करून घेतात. यामागे काय कारण असावे? अनेक नाजुक भागांचं वॅक्स करताना तिथं इजा होण्याची शक्यता असते. याविषयी स्त्रीरोग व वंध्यत्व तज्ञ डॉ. शिल्पा चिटणीस जोशी यांनी मोलाची माहिती दिली आहे. जाणून घेऊया.

त्यांच्याकडे एक मुलगी रडत आली. खास लग्नासाठी म्हणून बिकीनी वॅक्स करताना तिला इजा झाली आणि रक्तस्राव थांबतच नव्हता. त्यावेळी तिला काही टाके घालून तो रक्तस्राव थांबवावा लागला असा अनुभव त्यांनी आपल्या फेसबुक पोस्टमध्ये शेअर केला आहे. त्यात त्यांनी महिलांना बिकीनी वॅक्स संदर्भात काही मोलाच्या गोष्टीही सांगितल्या आहेत. स्त्री रोग तज्ज्ञ म्हणून त्यांचा हा सल्ला फार महत्वाचा आणि सर्वच महिलांनी लक्षात ठेवण्यासारखा आहे.

त्या म्हणतात, स्त्रियांच्या योनीमार्गाच्या भागात असलेले केस योनिमार्गाचे संरक्षण करत असतात.वेगवेगळ्या प्रकारच्या महत्त्वाच्या जिवाणूंचे वास्तव्य या भागात आणि योनीमार्गाच्या आतही असते.या जिवाणूंमुळे योनीमार्गाची प्रतिकार शक्ती टिकून राहते आणि वेगवेगळ्या संसर्गाचा जास्त चांगला प्रतिकार होऊ शकतो.हे सगळे केस जेव्हा शेविंग किंवा वॅक्सिंग करून काढले जातात तेव्हा या केसांची मुळे उघडी पडतात, दुखावली जातात.

त्यामुळे केसांच्या मुळात वेगवेगळे जंतुसंसर्ग होऊ शकतात.योनीमार्ग पूर्ण उघडा पडल्याने जास्त कोरडेपणा येऊ शकतो.परिणामी त्या भागात बाहेर आणि आतल्या बाजूलाही जंतुसंसर्ग होऊ शकतात. कोरडा पडलेल्या योनिमार्गात प्रतिकार शक्ती कमी होते तसेच खाज सुटू शकते.ह्या एवढ्या सगळ्या समस्या सगळे केस मुळासकट काढण्याच्या अट्टाहासामुळे होऊ शकतात.

त्यामुळे फक्त पुरुषांना केसविरहित योनी मार्ग आवडतो म्हणून किंवा बिकीनीवर फिरता यावं म्हणून शरीराचे एवढे हाल करून घेणे कितपत योग्य आहे याचा विचार महिलांनी करणे आवश्यक असल्याचा सल्ला त्यांनी यावेळी दिला आहे.