भगर खाताय; बाळगा सावधगिरी

नवरात्र उत्सवाला मोठ्या उत्साहात प्रारंभ झाला असून भाविकांनी रविवारपासून उपवासाला प्रारंभ केला आहे. नऊ दिवस उपवासाला भगर, फळे खाल्ली जातात. दरम्यान भगर खाल्ल्याने विषबाधा होण्याचे प्रकार दरवर्षी घडतात. यामुळे भगर खाताना महिलांनी काळजी घ्यावी असे आवाहन येथील ग्रामीण रुग्णालयाचे वैद्यकीय अधिकारी डॉ. अमोल वाघ यांनी केले आहे.

भगरीपासून विविध प्रकारचे पदार्थ तयार करून खाल्ले जातात. फराळ तयार करण्यापूर्वी भगर स्वच्छ धुवावी. वाळवून त्याचे पीठ तयार करावे व नंतरच त्यापासून तयार केलेल्या दशम्या खाव्यात. ताजे पदार्थ करून खावेत असे आवाहनही आरोग्य विभागाने केले आहे. भगर हे अन्न पचण्यासाठी हलके असते. यामुळे सतत नऊ दिवस तिचे सेवन करताना शक्यतो शिळी भगर खाण्याचे टाळावे. आवश्यक तेवढीच ताजी भगत तयार करून खावी. शिळ्या भगरीत विष तयार होते अशी माहिती डॉ.अमोल वाघ यांनी दिली.

उपवास म्हणजे फक्त शारीरिक उपवास नव्हे. उपवास म्हणजे भगवंताच्या जवळ वास करणे. नवरात्रीनिमित्त उत्सव काळात मन प्रसन्न राहावे, मनात भगवंत चिंतन घडावे म्हणून शुद्ध आहाराचे सेवन करून उपवास करण्याचे संकेत दिले आहेत. माणसाने फक्त शारीरिक उपवास न करता वाचिक व मानसिक उपवासही केले पाहिजे.

आपल्या वाणीतून कोणाविषयी वाईट चिंतन न करणे म्हणजे वाचक उपवास होय. याचप्रमाणे मनामध्ये भगवंत चिंतन करून नामस्मरणात तल्लीन राहणे म्हणजे मानसिक उपवास होय. उत्सव काळात या तीन प्रकारच्या उपवासाची गरज आहे.

- रवी महाराज मुळे, पुरोहित, टेंभुर्णी

व्यापाऱ्यांनी शक्यतो नवीन आणलेल्या भगरीचीच विक्री करावी. जुनी साठवणूक केलेली भगर विक्री केल्यास उपवासधारकांना वाईट परिणामांचा सामना करावा लागतो. परिणामी व्यापाऱ्यांनाही याचा रोष पत्करावा लागतो. यामुळे महिलांनी शक्यतो बंद पाकिटातील भगर खरेदी करावी.

—मनीष सोमाणी, व्यापारी, टेंभुर्णी